आंगनबाड़ी म बढि़या बुता करइया के सम्मान करिस मंत्री श्रीमती अनिला भेंड़िया

अंजोर.रायपुर। महिला बाल विकास अउ समाज कल्याण मंत्री श्रीमती अनिला भेंड़िया ह बिरस्पत के बलौदाबाजार-भाटापारा जिला के सिमगा विकासखण्ड के गांव हथबंद म आयोजित महिला सम्मेलन म बढि़या बुता करे खातिर 30 ले जादा महिला  अधिकारी अउ कर्मचारी मनके सम्मान करिन। ओमन 5 आंगनबाड़ी केन्द्र ल गैस-चूल्हा अउ महिला कोष ले आने-आने स्व-सहायता समूह ल 11 लाख रूपिया ले जादा के करजा तको दीस। अंतरराष्ट्रीय महिला दिवस के मउका म कार्यक्रम के आयोजन करे गिस।  

मउका म राज्य सभा के पूर्व सांसद श्रीमती छाया वर्मा, किसान कल्याण बोर्ड के अध्यक्ष सुरेंद्र शर्मा, जीव जंतु कल्याण बोर्ड के अध्यक्ष विद्याभूषण शुक्ल, छत्तीसगढ़ पाठ्य पुस्तक निगम के अध्यक्ष शैलेश नितिन त्रिवेदी, जिला पंचायत अध्यक्ष राकेश वर्मा, पूर्व विधायक बलौदाबाजार जनक राम वर्मा, पूर्व विधायक दुर्ग श्रीमती प्रतिमा चंद्राकर, सहित स्थानीय जनप्रतिनिधिगण बड़े संख्या म उपस्थित रिहिस।

श्रीमती भेंड़िया ह किहिन के प्रदेस के महिला मन हर क्षेत्र म कामयाब होत हावयं। महिला मन खेती किसानी करे ले लेके हवाई जहाज तक उड़ाके आने-आने क्षेत्र के माध्यम ले देश के सेवा करत हावय। राज्य सरकार महिला मन के खातिर कई योजना चलावत हावयं। हाल ही म राज्य सरकार डहर ले मजदूर परिवार के बेटी मन के शिक्षा, रोजगार अउ बिहाव म मदद के खातिर मुख्यमंत्री नोनी सशक्तीकरण योजना सुरू के हावय। ए योजना के माध्यम ले पात्र पंजीकृत हितग्राही मन के पहिली दू पुत्री के बैंक खाता म एकमुश्त रकम के भुगतान करे जाही। राज्य के सबोच जिला म पीड़ित महिला मन के सुरक्षा के खातिर सखी वन स्टॉप सेंटर संचालित करे  जात हावयं। ये सेंटर के माध्यम ले एक छत के खल्हे महिला मन के फोकट म विधिक चिकित्सा, सलाह अउ आश्रय दे जात हावय।

श्रीमती भेंड़िया ह किहिन के राज्य सरकार ह महिला मन अउ लइका के खातिर काम करइया आंगनबाड़ी कार्यकर्ता अउ सहायिका मनके मानदेय बढ़ाये के फइसला ले हावय। ए मउका म लइका डहर ले मनमोहक सांस्कृतिक कार्यक्रम तको प्रस्तुत करे गिस।