दंतेवाड़ा फागुन मड़ई म आए देवी-देवता के बिदाई, मुख्यमंत्री भूपेश बघेल गीदम मेडिकल कॉलेज ल मां दंतेश्वरी के नाम म करे के घोसना करिस

दंतेवाड़ा फागुन मड़ई म आए देवी-देवता के बिदाई

अंजोर.दंतेवाड़ा। मुख्यमंत्री भूपेश बघेल दंतेवाड़ा म माँ दंतेश्वरी मंदिर परिसर म आयोजित फागुन मड़ई म आए देवी-देवता के बिदाई समारोह म सामिल होइस। इहां मुख्यमंत्री ह गीदम म बनइया मेडिकल कॉलेज के नामकरण मां दंतेश्वरी के नाम म करे, गीदम के नवा राजस्व अनुभाग के दर्जा दे अउ शंखनी-डंखनी नदी म पर्यटन के खातिर रिवर फ्रंट व्यू पॉइंट के बनाये घोसना करिस।

ओड़ीसा, तेलंगाना सहित बस्तर के 851 देवी, देवता के बिदाई

फागुन मड़ई म आए देवी-देवता के बिदाई समारोह म पहिली बार सामिल होइस प्रदेस के मुख्यमंत्री ह इहां ओड़ीसा, तेलंगाना सहित बस्तर के 851 देवी, देवता के बिदाई ल अदभुत बताइन। ओमन किहिन के बस्तर के संस्कृति के कई रंग हावयं, बस्तर के दशहरा के समान दंतेवाड़ा के फागुन मड़ई तको पूरा दुनिया म परसिध हावय। मां दंतेश्वरी के आंगन म होली खेले के खातिर क्षेत्र के सैकड़ों देवी-देवता इहां आथे। हमर इहां के आदिवासी परंपरा के पाछु जेन भाव, दरसन अउ कथा हावयं, ओला जाने-समझे बिना छत्तीसगढ़ के संस्कृति के नइ पहचाने जा सके। सरकार ह अपन गौरवशाली अउ अनूठी परंपरा अउ तीज-त्यौहार ल सहेजे के काम करे हावय। गांव-गांव के देवगुड़ी के संरक्षण के काम तको इही उद्देश्य ले सुरू करे हावय। आदिवासी परंपरा के आगू बढ़इया पुजारी, बैगा, गुनिया, मांझी, हाट पहरिया, बजा मोहरिया ल राजीव गांधी ग्रामीण भूमिहीन कृषि मजदूर न्याय योजना म सामिल करत उंकर खातिर 7 हजार रूपिया के वार्षिक मदद के बेवस्था करे गे हावय।

कार्यक्रम के उद्योग मंत्री अउ जिला के प्रभारी मंत्री कवासी लखमा, सांसद दीपक बैज, विधायक श्रीमती देवती कर्मा ह तको सम्बोधित करिन। ए मउका म बस्तर विकास प्राधिकरण के उपाध्यक्ष विक्रम मंडावी, विधायक चित्रकोट राजमन बेंजाम, क्रेडा के अध्यक्ष मिथलेश स्वर्णकार, इंद्रावती विकास प्राधिकरण के उपाध्यक्ष राजीव शर्मा, जिला पंचायत अध्यक्ष तूलिका कर्मा, मुख्यमन्त्री सचिव सिद्धार्थ कोमल परदेशी, कमिश्नर श्याम धावड़े, आईजी सुंदरराज पी., संचालक खनिज विभाग जय प्रकाश मौर्य, कलेक्टर विनीत नंदनवार, पुलिस अधीक्षक सिद्धार्थ तिवारी, मंदिर समिति के पुजारी, मांझी चालकी अउ आन सहित स्थानीय जनप्रतिनिधी मन उपस्थित रिहिस।