कांकेर म गउठान बनिस आय के जरिया, भाटा, मिरचा, रमकेरिया अउ पताल के खेती

अंजोर.कांकेर। जिला के सबो विकासखंड के आने-आने गांव म गउठान बनाए गे हावयं, जिहां म गोधन न्याय योजनांतर्गत गोबर खरीदी करे जात हावय, जेकर ले वर्मी कम्पोस्ट बनाये करे जात हावय। ए बुता म गांव के महिला स्व-सहायता समूह के महिला मन तको अपन हाथ बंटात हावय। उंकर डहर ले वर्मी कम्पोस्ट के छनाई के अलावा गउठान के भूमि म सब्जी-भाजी के खेती तको करे जात हावय, जेन उंकर अकताहा आमदनी के जरिया बने हावय।

चारामा विकासखण्ड के आदर्श गउठान लखनपुरी म वैष्णवी स्व-सहायता समूह के महिला मन डहर ले गउठान के जमीन म सब्जी-भाजी के खेती करे जात हावय, जेन उपराहा आमदनी के जरिया बने हावय। उंकर डहर ले गउठान के जमीन म मछरी पालन के बुता करे जात हावय, येकर अलावा अभी के बेरा म टमाटर, बैंगन अउ भिण्डी के फसल लगाये गे हावय। टमाटर अउ बैंगन के उत्पादन होवत हाबे, जेला स्थानीय हाट-बाजार के अलावा आश्रम-छात्रावास अउ आंगनबाड़ी केन्द्र म बेचे जात हावय।

स्व-सहायता समूह के अध्यक्ष श्रीमती मंजू सेन अउ सचिव श्रीमती नंदिनी यादव ह बताइन के गउठान के जमीन म उंकर समूह के महिला मन डहर ले साग-सब्जी के खेती करे जात हावय, पहिली लगभग 30 क्विंटल मूली बेचे गे हावय, जेकर ले 25 हजार रूपिया के आमदनी होए हावय।

अभी के बेरा म टमाटर अउ बैगन के फसल लगाये गे हावय, लगभग 10 हजार रूपिया के टमाटर अउ 05 ले 06 हजार रूपिया के बैंगन बेचे जा चुके हावय अउ अभी भी बेचे जात हावय, जेकर ले अच्छा आमदनी होए के उम्मीद हावय। ओमन बताइन के समूह के महिला मन डहर ले फेंसिंग पोल तको बनाये गे रिहिस, जेकर बेचे ले ओला 05 लाख 50 हजार रूपिया के आमदनी होए हावय।

कलेक्टर डॉ. प्रियंका शुक्ला अउ जिला पंचायत के मुख्य कार्यपालन अधिकारी सुमीत अग्रवाल ह आज ये गउठान के निरीक्षण करिन अउ महिला स्व-सहायता समूह डहर ले करे जात बुता के जानकारी लिस अउ ओला आयवर्धक बुता करे के खातिर प्रोत्साहित करिन। सब्जी-भाजी म टमाटर, बैंगन के फसल ले के अलावा मिर्च, करेला उक के तको फसल ले के खातिर तको समझाइश दीस, ताकि जादा फायदा मिले सके।