कलार समाज महासम्मेलन : बहादुर कलारिन के जयंती म एच्छिक छुट्टी अउ महुआ बोर्ड के स्थापना के मुख्यमंत्री ह करिस घोसना

छत्तीसगढ़ कलार महासभा

अंजोर.रायपुर। उद्योग व्यापार म कलार समाज के कोनो नकार नइ सके, फेर बिना शिक्षा के कोनो भी समाज हो आगू नइ बढ़ सकत हावय। सबोच समाज के खातिर शिक्षा जरूरी हावय अउ जेन भी शिक्षा ले नाता तोड़े हावय वो समाज पिछड़गे हावय। ये बात ल मुख्यमंत्री भूपेश बघेल ह छत्तीसगढ़ कलार महासभा के डहर ले रायपुर के साइंस कालेज मैदान म आयोजित कलार महासम्मेलन म कहिस।

बहादुर कलारिन के जयंती म एच्छिक छुट्टी अउ महुआ बोर्ड के स्थापना-

ए मउका म मुख्यमंत्री ह दू बड़का घोसनां करत किहिन के छत्तीसगढ़ म महुआ बोर्ड के स्थापना करे जाही। कलार समाज के पूजनीय महतारी बहादुर कलारिन के महिला सशक्तीकरण के योगदान के अतुलनीय करार देत मुख्यमंत्री ह उंकर जयंती म एच्छिक छुट्टी के प्रावधान करे  जाये के घोसना करे हावय।

मुख्यमंत्री बघेल ह किहिन के सबोच समाज के इकाई मनखे होवत  हावय अउ राज्य सरकार ह पाछु चार साल म मनखे ल ही केंद्र म रखके योजना सुरू करे हावयं ताकि हर समाज के लोगन लाभांवित हो सकें। मुख्यमंत्री ह किहिन के वो यदि योजना मन के फायदा लोगन के नइ  मिले, लोगन बीमार रिहिनं त मजबूत छत्तीसगढ़ के कल्पना कभू नइ हो सकत हावय इही सेती समाज के आखरी मनखे के जेब म तको पइसा जाए येकर प्रावधान छत्तीसगढ़ शासन ह करे हावय ताकि प्रदेस के प्रगति सरलग होवत रिहि।

मुख्यमंत्री ह किहिन के छत्तीसगढ़ म आने आने समाज के लोगन मिलजुल करके रिथें, जाति वैमनस्यता के इहां कोनो जगह नइ हावय। ओमन किहिन के छत्तीसगढ़ के लोगन के सामाजित ताना-बाना गजब मजबूत हावय अउ येकर ले छत्तीसगढ़ के मजबूती मिलत हावय।

कलार महासम्मेलन के आयोजन मउका म संसदीय सचिव विकास उपाध्याय, विधायक मोहन मरकाम, विधायक विनय जायसवाल, विधायक श्रीमती संगीता सिन्हा, रायपुर महापौर ऐजाज ढेबर, रिसाली महापौर श्रीमती शशि सिन्हा, कलार महासभा छत्तीसगढ़ के अध्यक्ष दीपक सिन्हा, कलार महासम्मेलन संयोजक समिति के अध्यक्ष राजा जायसवाल समेत आन पदाधिकारी अउ कलार समाज के सदस्य उपस्थित रिहिस।