धमतरी के गांव बोड़रा म जिला स्तरीय पशु मेला उत्सव प्रदर्शनी

अंजोर.धमतरी। विकासखण्ड धमतरी के गांव बोड़रा म पशुधन विकास विभाग डहर ले जिला स्तरीय पशु मेला उत्सव प्रदर्शनी के आयोजन करे गिस। ये प्रदर्शनी म जिला के 13 गांव के 122 गरूवा पोसइया मन के 186 पशुधन, जेमा 170 गौवंशीय, 05 भैंसवंशीय, 07 बकरा-बकरी अउ 04 मुर्गा-मुर्गी के प्रदर्शन करे गिस। कार्यक्रम म जिला पंचायत उपाध्यक्ष नीशु चन्द्राकर, सदस्य जीव जंतु कल्याण बोर्ड छत्तीसगढ़ मदन मोहन खण्डेलवाल, उप संचालक पशु चिकित्सा सेवा डॉ.महेश सिंह बघेल के अलावा क्षेत्र के जनप्रतिनिधि उपस्थित रिहिस।

जिला पंचायत उपाध्यक्ष नीशु चन्द्राकर ह अपन उद्बोधन म किहिन के सफल कार्यक्रम अउ उत्कृष्ट पशुपालन बर गांव बोरड़ा के गरूवा पोसइया मन के मैं बधाई देत हावं। ओमन किहिन के प्रदेस के मुख्यमंत्री भूपेश बघेल डहर ले गरूवा पोसइया मन के आय म बड़वार बर केऊ योजना मन के क्रियान्वयन करे जात हावय। जेकर ले गरूवा पोसइया मन के आय म बड़वार हो रेहे हावय। चन्द्राकर ह गरूवा पोसइया मन के योजना मन के फायदा ले बर प्रोत्साहित करिन। प्रदर्शनी म धमतरी विकासखंड के लगभग 55 चरवाहा के ग्रामोत्थान योजना ले कृत्रिम गर्भाधान अउ बधियाकरण म सहयोग दे करे बर 75 हजार रूपिया के मानदेय बाटे गिस।

उहें सहायक पशु चिकित्सा क्षेत्र अधिकारी के रूप म उत्कृष्ट बुता करत विभागीय योजना मन अउ कृत्रिम गर्भाधान म सफल क्रियान्वयन बर बी.एस. साहू मुख्य गांव इकाई भोथली अउ एम.आर. नेताम मुख्य गांव इकाई आमदी के प्रशस्ति पाती अउ चिन्हारी चिनहा दे करके सम्मानित करे गिस। येकर अलावा परब प्रदर्शनी म लाए गे पशु मन के सबोच वर्ग म प्रथम, दूसरइया अउ तीसरा पुरस्कार ल बाटे गिस।