महिला पुलिस ल मिलिस स्कुटी अउ नारी मनके एसएसपी के हाथ ले होइस सम्मान

अंजोर.रायगढ़। विश्व महिला दिवस अउ होली एक संग होए ले होली के लाइन आर्डर ड्यूटी ल देखत जिला पुलिस डहर ले अंतर्राष्ट्रीय महिला दिवस कार्यक्रम आयोजन एक दिन पहिली पुलिस सामुदायिक भवन म करे गिस । कार्यक्रम म वरिष्ठ पुलिस अधीक्षक सदानंद कुमार, रायगढ़ महापौर श्रीमती जानकी काटजू, नेता प्रतिपक्ष  श्रीमती पूनम सोलंकी, एसडीओपी खरसिया श्रीमती निमिषा पांडेय, डीएसपी श्रीमती निकिता तिवारी, डॉक्टर ममता पटेल के गरिमामयी उपस्थिति रिहिस।कार्यक्रम म मां सरस्वती के प्रतिमा के तीर दीप प्रज्वलित करके कार्यक्रम के शुरूवात करे गिस। कार्यक्रम म आदर्श ग्राम्य भारतीय स्कूल के पढ़इया लइका डहर ले सरस्वती वंदना अउ स्वागत गीत प्रस्तुत करे गिस। 

ये मउका म वरिष्ठ पुलिस अधीक्षक सदानंद कुमार डहर ले उपस्थित युवति, महिला मन ल “अंतर्राष्ट्रीय महिला दिवस” अउ  होली के सुभकामना देत बताइस के आज के महिला मन आदमी ले जादा सशक्त हावयं सिरिफ ओला मउका दे जाना चाहि। देश के प्रगति अउ समाज के विकास महिला मन के भागीदारी के बिना सम्भव नइ होवय। रायगढ़ महापौर ह तको महिला मन के आदमी ले जादा बलशाली बतात होइस स्वच्छता दीदी के उदाहरण पेश करिस।। नेता प्रतिपक्ष  पूनम सोलंकी डहर ले तको महिला मन के उत्साहवर्धन करत उंकर सशक्तिकरण के खातिर समाज के सशक्त बनाये के जरूरत म जोर दीस। कार्यक्रम म पुलिस सेवा म लगे महिला पुलिसकर्मी अउ खेल, शिक्षा, पत्रकारिता अउ आन आने-आने क्षेत्र ले उत्कृष्ट बुता करे वाला महिला मन के प्रशस्ति पत्र, चिनहा देके सम्मानित करे गिस संग ही पुलिस मुख्यालय ले जिला के 09 महिला डेस्क के प्रदाय करे गे स्कुटी ल तको बाटे गिस। अंतर्राष्ट्रीय महिला दिवस के संबंध म मीडिया ले गोठबात करके एसएसपी सदानंद कुमार ह किहिन के महिला आरक्षक के स्कुटी के मिलना महिला शिकायत के निराकरण के दृष्टि ले काफी अच्छा हावय।