हमर सबले बड़े ताकत बाबा साहेब अंबेडकर के दे संविधान हावय : मुख्यमंत्री भूपेश बघेल

अंजोर.रायपुर। मुख्यमंत्री भूपेश बघेल ह किहिन के देश के लोगन के सबले बड़े ताकत बाबा साहेब अंबेडकर डहर ले दे हमर संविधान हावयं। हमर संविधान हमन ल अधिकार सम्पन्न बनाथे। मुख्यमंत्री भूपेश बघेल ह रायपुर म संविधान निर्माता, भारतरत्न बाबा साहेब अंबेडकर के 132वीं जयंती के मउका म आयोजित सार्वजनिक जयंती समारोह के सम्बोधित करत ए आशय के विचार प्रकट करिस। मुख्यमंत्री ह येकर पहिली अंबेडकर चौक म बाबा साहेब अंबेडकर के आदमकद प्रतिमा म माल्यार्पण करके ओला श्रद्धांजलि अर्पित करिस।

भारतरत्न बाबा साहेब अंबेडकर के 132वीं जयंती

मुख्यमंत्री ह किहिन के एक कोति देश आजादी के लड़ाई लड़त रिहिस, उहें दूसरी कोति बाबासाहेब अंबेडकर दबे कुचले  समाज के अधिकार देवाये के खातिर संगठित करत संघर्ष करत रिहिस। बाबासाहेब ह समाज के पिछड़ा वर्ग के लोगन ल शिक्षित अउ संगठित होके संघर्ष करे के प्रेरणा दीस। बघेल ह किहिन के बाबा साहेब ह ये महसूस करिन के भारतीय समाज के सबले बड़े कमजोरी शिक्षा के हावय। ओमन भारतीय दरसन के उल्लेख करत किहिन के हम पूरा विश्व ल अपन परिवार मानत हन। वैचारिक दृष्टि ले हम बहुत ऊंचा हावत, फेर हमर व्यवहार वैइसे नइ हावय। हमर समाज म मनुष्य के संग भेद-भाव करे जाथे, समानता के व्यवहार नइ करे जाए। बाबा साहेब सहित देश के केऊ महाआदमी ह भारतीय समाज के ए बुराई के महसूस करिन अउ येकर विरूद्ध लड़ाई लड़ीस। बाबा साहेब भीमराव अंबेडकर ह दलित, शोषित अउ पीड़ित मन के आवाज बनके उंकर अधिकार के खातिर लड़ाई लड़ीस।