माता कौशल्या महोत्सव के भक्तिमय कार्यक्रम संग समापन

अंजोर.रायपुर। मातृ शक्ति ल समर्पित विश्व के एकमात्र कौशल्या महतारी मंदिर छत्तीसगढ़ के चंदखुरी म हावय। नारी सशक्तिकरण ल बढ़ावा दे के खातिर मंदिर प्रांगण म तीन दिवसीय माता कौशल्या महोत्सव के आयोजन करे जात हावय। महोत्सव के तीसरा दिन के समापन मुख्यमंत्री भूपेश बघेल के खास आतिथ्य म होही। ए बखत देश के मशहूर गायक पद्म कैलाश खेर अपन भक्तिमय गीत मन ले महतारी कौशल्या धाम म देखइया के आगू अपन मनमोहक प्रस्तुति दिही।

येकर संग ही मुंबई के मशहूर गायिका तृप्ति शाक्या, रायगढ़ के देवेश शर्मा के भक्तिमय गीत संगीत के संग ही स्थानीय महिला मानस मंडली के डहर ले रामायण मानस गायन के प्रस्तुति दे जाही। जानबा हावय के राम रामायणी परंपरा के आगू बढ़ाये के खातिर रामायण मानस मंडली कलाकार मन के सम्मान दे के परंपरा के सुरू करे गे हावय। येकर तहत राज्य सरकार डहर ले प्रति मानस मंडली ल 5 हजार रूपिया के प्रोत्साहन रकम दे जात हावय।

माता कौशल्या महोत्सव के समापन मउका म अध्यक्ष के तौर म संस्कृति मंत्री अमरजीत भगत, खास अथिति के रूप म गृह अउ पर्यटन मंत्री ताम्रध्वज साहू, कृषि मंत्री रविन्द्र चौबे अउ नगरीय प्रशासन मंत्री डॉ शिव कुमार डहरिया उपस्थित रइही।