संत मन लोगन ल समानता के संग जीये के रद्दा बताइन : मुख्यमंत्री बघेल

अंजोर.रायपुर। मुख्यमंत्री भूपेश बघेल महादेव घाट रोड के सतनाम भवन म आयोजित छत्तीसगढ़ मेहर समाज के प्रदेस स्तरीय सामाजिक अउ युवक-युवती परिचय सम्मेलन म सामिल होइस। ए मउका म ओमन किहिन के महान संत रविदास ह कर्म ल ही पूजा किहिन। कोनो काम छोटे नइ होत  हावय। लोगन अपन विचार ले छोटे होत हावयं। भक्तिमार्ग म संत रविदास के नाम पूरा दुनिया म श्रद्धा ले लिस। संत ह लोगन के समानता के संग जीये के रद्दा बताइन। मुख्यमंत्री ह ए मउका म नया रायपुर म संत रविदास के नाम ले चौक के नामकरण अउ रविदास के जयंती मनाने के खातिर हरेक साल 5 लाख रूपिया के रकम दे के घोसना करिस।

मुख्यमंत्री बघेल ह किहिन के संविधान म लोगन के सामाजिक न्याय देवाये के खातिर आरक्षण के प्रावधान करे गे हावय। राज्य म आर्थिक रूप ले कमजोर के मजबूत करे अउ ओला योजना मन के फायदा देवाये के खातिर 1 अप्रैल ले सर्वे के बुता करे जात हावय। राज्य म किसान मन के आर्थिक स्थिति के मजबूत करे अब अगले सीजन ले 20 कोंटल प्रति एकड़ धान के खरीदी करे जाही। ग्रामीण औद्योगिक पार्क ले लोगन के परंपरागत बुता करे के मउका मिलही। आम नागरिक के खातिर सरकार डहर ले शिक्षा, स्वास्थ्य, रोजगार उक क्षेत्र म बुता करे जात हावयं।

मुख्यमंत्री ह कार्यक्रम म आदर्श बिहाव करके नव दाम्पत्य जिनगी म प्रवेश करे वाला चार जोड़ा ल आशीर्वाद दीस। येकर संग ही समाज के उत्कृष्ट कलाकार, आने-आने राजनीतिक पद म आसीन समाज के प्रतिनिधी, समाज के 6 लोगन के मेहर रत्न अउ प्रतिभावान छात्र-पढ़इया लइका के सम्मानित करिन। समाज के प्रदेस अध्यक्ष खिलावन बघेल ह सलाहकार परिषद बोर्ड अउ आयोग म समाज के प्रतिनिधित्व दे के खातिर मुख्यमंत्री के प्रति आभार जताइस। ओमन किहिन के समाज के गरिमा के मुताबिक छत्तीसगढ़ चर्म शिल्पकार विकास बोर्ड के गठन करे गिस, येकर लिये सरी समाज अनुग्रहित होइस हावय।

ए मउका म संसदीय सचिव अउ रायपुर पश्चिम विधायक विकास उपाध्याय, छत्तीसगढ़ चर्म शिल्पकार विकास बोर्ड के अध्यक्ष तरुण बिजौर, समाज के आन सामाजिक प्रतिनिधिगण सहित बड़े संख्या म सामाजिक बंधु उपस्थित रिहिस।