अक्ति तिहार म माटी पूजन करके, बीजहा बो के जैविक खेती अपनाये ल कहिस मुख्यमंत्री भूपेश बघेल

अंजोर.रायपुर। मुख्यमंत्री भूपेश बघेल आज इंदिरा गांधी कृषि विश्वविद्यालय परिसर म आयोजित अक्ती तिहार अउ माटी पूजन कार्यक्रम म सामिल होइस। मुख्यमंत्री ह ए मउका म गांव के माटी, देवी-देवता अउ ठाकुर देव के पूजा अउ बीजहा बुवाई संस्कार के तहत लौकी, सेम, तोरई के बीजहा बोइस। मुख्यमंत्री ह अच्छा फसल के खातिर धरती महतारी ले कामना करत कोठी ले धान के बीजहा लान के पूजा करिस अउ गौ-माता ल चारा तको खिलाइस। मुख्यमंत्री भूपेश बघेल ह धरती महतारी ले राज्यवासी ल धन-धान्य ले भरे रेहे के कामना करिस।

ए मउका म मुख्यमंत्री भूपेश बघेल ह कृषि विश्वविद्यालय परिसर म किसानसभागार भवन, नवा बने क्लस्टर क्लासरूम भवन, महात्मा गांधी उद्यानिकी अउ वानिकी विश्वविद्यालय के कैम्प कार्यालय के उद्घाटन करिन। मुख्यमंत्री भूपेश बघेल ह किसान मनला किहिन के जइसे हम अपन स्वास्थ्य के संसो करत हावयं वइसने ही धरती महतारी के तको संसो करना चाही। हमन ल कृषि म रासायनिक खातु के उपयोग कम करके जैविक खेती के कोति बढ़ना चाही। हम जेन भी सुविधा ले रिहिन हावयं सबो प्रकृति ले मिल रेहे हावयं।

अक्ति अउ माटी पूजन तिहार धरती के प्रति अपन कृतज्ञता प्रकट करे के तिहार हावय। हमन ल ये सोचना चाही के प्रकृति ले हम जतका लेत हावयं उंकर बदला म धरती के का वापस करत हावयं। अक्ति तिहार के मउका म खेती-किसानी के बुता सुरू करे के खातिर धरती महतारी ले प्रार्थना करके हम उंकर ले अनुमति लेवत हावयं तब कुदारी चलात हावन। धरती महतारी के जेन क्षति होवत हावय उंकर खातिर हम क्षमा मांगत हावन। ए मउका म मुख्यमंत्री ह कृषि अभियांत्रिकी ल अलग संचालनालय बनाये के घोसना करिस।