चंदखुरी म माता कौशल्या महोत्सव, जुरियाही देस अउ प्रदेस के नामी कलाकार

 चंदखुरी म माता कौशल्या महोत्सव

अंजोर.रायपुर। भगवान राम के ममा गांव चंदखुरी म एसो अक्ति के दिन ले तीन दिन के जबर मेला भरावत हाबे। माता कौशल्या महोत्सव बर प्रदेस सरकार करे हावय जबर तइयारी। महोत्सव म छत्तीसगढ़ सहित देस के नामी बड़का कलाकार मनके सांस्कृतिक कार्यक्रम के आयोजन करे जाही।

सांस्कृतिक कार्यक्रम म 22 अप्रैल के माधुरी महिला मानस मंडली गरियाबंद, वाराणसी के व्योमेश शुक्ला, मुम्बई के सुप्रसिद्ध भजन गायिका सुश्री कविता पौडवाल ल भक्तिमय गीत-संगीत भजन प्रस्तुति देही।

 23 अप्रैल के वीणा वादिनी मानस परिवार भाटापारा, हरि दरसन मानस मंडली जांजगीर-चांपा, दंतेवाड़ा ले ज्ञान गंगा मानस परिवार के कुशल सिंह साहू, मुंबई के सुश्री रविंदर खुराना, प्रभंजन चतुर्वेदी भिलाई के भक्तिमय गीत संगीत भजन के कार्यक्रम होही। 

24 अप्रैल के प्रज्ञा महिला मानस परिवार कुरूद सिलयारी, देवेश शर्मा रायगढ़, मुंबई के सुश्री तृप्ति शाक्य  के भक्तिमय गीत संगीत भजन के प्रस्तुति होही। 

माता कौशल्या महोत्सव के मुख्यमंत्री भूपेश बघेल ह 22 अप्रैल के उद्घाटन करही। ये मउका संस्कृति मंत्री अमरजीत भगत, पर्यटन मंत्री ताम्रध्वज साहू, कृषि मंत्री रविन्द्र चौबे, नगरीय प्रशासन मंत्री डॉ. शिवकुमार डहरिया अउ सबो मंत्रीगण, सांसदगण, संसदीय सचिव, विधायकगण, निगम मंडल, आयोग, जिला पंचायत के अध्यक्ष अउ उपाध्यक्ष अउ नगर पंचायत के अध्यक्ष सामिल होही।