रोज-रोज के झगरा ले हलाकान महतारी, बहु के मायके जाये के बाद बेटा के कर दिस हत्या... छत्तीसगढ़ी म पढ़व पूरा खबर

अंजोर.धमतरी। बाजार पारा गंगरेल म गणेश पटेल पिता संतराम पटेल उमर लगभग 40 साल साकिन बाजार पारा गंगरेल के कोनो अज्ञात मनखे ह धार दार हथियार ले पेट म मार दे हावय जेकर ले लहू बहत हावय केके उंकर माता फुलेश्वरी पटेल के सूचना म थाना सिविल लाइन रुद्री प्रभारी डहर ले मउका म पहुंच के पहिली दृष्टया म हत्या प्रतीत होए ले शव के मउका मुआयना अउ पंचनामा करके मर्ग कायम करके विवेचना म लिस।

पुलिस अधीक्षक महोदय प्रशांत ठाकुर डहर ले मामला के गंभीरता ले लेवत तुरते जांच करके कार्यवाही करे के निर्देश दिये गे रिहिस। जेमा म अकताहा पुलिस अधीक्षक के मार्गदर्शन म अउ डीएसपी.के.के.वाजपेयी के अगुवई म थाना प्रभारी रूद्री डहर ले तुरते जॉच के कार्यवाही करत शव परिक्षण करके शार्ट पी.एम.रिपोर्ट म हत्या के मामला पाये जाये ले मउका म पाये साक्ष्य के आधार अउ निरीक्षण अउ जॉच विवेचना के बखत आरोपी के पता तलाश करे जात रिहिस। आस पास ले तको पूछताछ करे गिस, जेमा मरइया के पत्नी अउ उंकर सास के संग आये दिन घर म लड़ाई झगड़ा होना बताइन अउ मरइया के माताजी ले तको पूछताछ करे गिस, जेमा ओमन माताजी ले पूछताछ के बखत घटना म संलिप्तता नजर आईस अऊ कड़ाई ले पूछताछ के बखत ओमन बताई के वो अपन बेटा के ईलाज अउ बहु ले लड़ाई झगरा ले तंग आ चुके रिहिस।  करीबन एक सप्ताह पहिली उंकर बेटा गणेश पटेल ह बोलिन के उंकर पास घर नइ हावय अउ पइसा तको नइ हावय वो ह अपन बीबी के संग जुन्ना घर म आके रहना चाहत रिहिन।

लेकिन उंकर मॉ अपन बहु के संग म नइ रखना चाहत रिहिस। जेकर सेती मोर बेटा के संग झगरा तको होए रिहिस बेटा के मानसिक स्थिति नानपन ले ठीक नइ रिहिस जेकर ईलाज मनोरोग अस्पताल माना तुता ले चल रिहिन। बेटे के मानसिक स्थिति ठीक नइ होए के सेती आये दिन उंकर संग लडाई झगड़ा करे, ओकर ईलाज के दवई के खरचा तको उंकर मॉ ल उठाना पड़त रिहिस।

मरइया गणेश के पत्नी बिहाव म अपन मायके बरदेभांठा कांकेर चले गे रिहिस। बेटा के मनासिक स्थिति ठीक न होए झगरा अउ दवई म खरचा अउ आये दिन उंकर बहु ले होवइया झगरा ले तंग आके अपन बेटा के बिहनिया 3:00 बजे के करीबन गणेश पटेल के किचन म रखे हसिया ले पेट म वार करके हत्या कर दिस।

आरोपिया फुलेश्वरी पटेल पति स्वर्गीय संतराम पटेल उमर 65 साल साकिन बाजार पारा गंगरेल थाना सिविल लाइन रुद्री। घटना म प्रयुक्त सामान ल छुपाये के तको प्रयास करिन जेला  पुलिस डहर ले बरामद करे गिस। आरोपिया के मेमोरेंडम कथन अउ पर्याप्त साक्ष्य के आधार म आरोपिया के विरुद्ध थाना रूद्री म धारा 302 भादवि० कायम करके आरोपिया के विधिवत गिरफ्तार करके न्यायिक रिमांड म भेजे हावय।