सूरजपुर म साहू समाज के धर्मशाला खातिर 50 लाख मंजूर, नगरीय प्रशासन मंत्री डहरिया ह करिन भूमिपूजन

अंजोर.रायपुर। प्रदेश के श्रम, नगरीय प्रशासन अउ विकास मंत्री डॉ. शिवकुमार डहरिया ह सूरजपुर प्रवास के बखत आज साहू समाज के जिला स्तरीय धर्मशाला के भूमि पूजन करिन। कार्यक्रम के अध्यक्षता साहू समाज के प्रदेस अध्यक्ष टहल साहू ह करिन। स्वागत भाषण प्रदेस सरकार के आन पिछड़ा वर्ग कल्याण सलाहकार परिषद के सदस्य गैबी नाथ साहू अउ महेंद्र साहू ह पहुना मन के स्वागत करिन।

कार्यक्रम के संबोधित करत पहुना मंत्री डॉ. डहरिया ह साहू समाज के गतिविधी के बढ़ई करत किहिन प्रदेस सरकार सबो समाज के विकास के खातिर कटिबद्ध हावय, अउ उदारता ले सहयोग देत हावय। ओमन साहू समाज के धर्मशाला के बाउंड्री वाल, किचन शेड, शौचालय अउ पानी के बेवस्था के खातिर 50 लाख के रकम तुरते मंजूरी करिन।

साहू समाज के प्रदेस अध्यक्ष टहल साहू ह समाज के एकजुट अउ विकास करे के खातिर आह्वान करिन अउ आज प्रदेस के सरकार सबो समाज के भूमि अउ राशी देके मंगल भवन बनवात हावय, हमर समाज इही रकम ले संगठित रिहि त आने वाला समय म निश्चित रूप ले बने वाला सरकार म हमर जिला के साहू समाज के भागीदारी रइही।

खास पहुना के रूप म प्रदेस के शिक्षा मंत्री माननीय डॉ. प्रेमसाय सिंह टेकाम, संसदीय सचिव पारसनाथ राजवाड़े, तेलघानी बोर्ड के अध्यक्ष संदीप साहू, जिला पंचायत उपाध्यक्ष नरेश राजवाड़े, उर्दू अकादमी बोर्ड के सदस्य मोहम्मद इस्माइल खान, श्रीमती शीलू साहू तको उपस्थित रिहिस।