दुनिया के सबले माहंगी आमा ल देखे के खातिर लोगन के भीड़ उमड़ीस

अंजोर.रायपुर। दुनिया के सबले मंहगा आमा ल देखे के खातिर लोगन के भीड़ उमड़ी। जापानी प्रजाति के आमा के ए किस्म के कीमत प्रतिकिलो दू लाख 70 हजार रूपिया हावय। जापान के मियाजकी आम के खासियत ये हावय के एक ही आम म दू रकम ले के सुवाद मिलत हावय। जानबा होवय के राजधानी रायपुर म लगाए गे आमा के प्रदर्शनी म 200 किस्म के आमा प्रदर्शित करे  गे रिहिस। ए प्रदर्शनी के आयोजन 17 ले 19 जून तक पंजाब केसरी भवन म उद्यान विभाग अउ प्रकृति के तनि सोसायटी के समिलहा तत्वाधान म करे गिस।

ए प्रदर्शनी के मुख्य आकर्षण के केंद्र दू किस्म के आम, एक हाथीझूल अउ दूसरा मियाजकी के रिहिस। हाथीझूल आम दुनिया के सबले बड़े आकार के किस्म के आम होवत हावयं, जेन 2 ले 5 किलो तक के वजन के होवत हावयं। दूसरा आकर्षण के केंद्र ‘मियाजकी आम‘ ह अपन अनोखी किस्म अउ माहंगी कीमत ले लोगन के आकर्षित करिन।

दुनिया के सबले माहंगी आमा जेन जापान के एक किस्म हावय, उंकर कीमत अन्तर्राष्ट्रीय बाजार म एक लाख 82 हजार रूपिया प्रति नग हावय अउ वजन 639 गांव हावय। ए आम के वजन अधिकतम 900 गांव तक होत  हावय अउ 2 लाख 70 हजार रूपिया प्रति किलो के कीमत होत हावय। ‘मियाजकी आम‘ के एक अउ खासियत हावय के पेड़ म लगे, फलन के बखत जिहां म धूप परत हावय उहां के सुवाद आने होवत  हावय, दूसरी कोति ले जिहां छाया म ये फल हावय। ए रकम ले ये एक आम दू रकम ले के सुवाद देत हावय।

प्रदर्शनी म कुल 61 किस्म के आमा प्रतियोगिता के खातिर पंजीकृत होइस। ए प्रदर्शनी म 200 ले जादा किस्म के आम राज्य के 33 जिला  के सरकारी रोपणी अउ किसान मन हिस्सा लिस। प्रतियोगिता म 700 आमा के किस्मवार अवलोकन करके 15 किस्म ल उत्कृष्ट प्रदर्श के प्रथम, 15 के दूसरइया अउ 15 के सांत्वना पुरस्कार प्रदाय करे गिस।