अभिनेत्री सुलोचना के निधन : प्रधानमंत्री नरेन्द्र मोदी सहित कई बड़े सिनेमा कलाकार मन दिस श्रद्धांजलि

अंजोर.एजेंसी। प्रधानमंत्री नरेन्द्र मोदी ह परसिध अभिनेत्री सुलोचना के निधन म गहरा दुख व्यक्त करिन हावय अउ किहिन हावय के उंकर भूमिका के माध्यम ले उंकर सिनेमा के विरासत जीवित रइही।

प्रधानमंत्री ह ट्वीट करिन के- "सुलोचना जी के निधन ले भारतीय सिनेमा के दुनिया म एक बड़े शून्यता आये हावय। उंकर अविस्मरणीय भूमिका ह हमर संस्कृति के समृद्ध करिन हावय अउ ओला कई पीढ़ी के लोगन के प्रिय बना दे हावय। उंकर भूमिका के माध्यम ले उंकर सिनेमा के विरासत जीवित रइही। उंकर परिवार के प्रति संवेदना। ओम शांति।"

जानबा होवय के दिग्गज अभिनेत्री सुलोचना लाटकर के निधन हो गे हावय। बॉलीवुड के वरिष्ठ अभिनेत्री सुलोचना लाटकर के तबियत काफी बिगड़ गे रिहिस, जेकर बाद 94 साल के अभिनेत्री के दादर के सुश्रुषा अस्पताल म भरती कराये गे रिहिस। जिहां ओमन आखरी सांस लिस।

ओमन ‘रेशमा अउ शेरा’, ‘मजबूर’ अउ ‘मुकद्दर के सिकंदर’ जइसे कइ यादगार फिलिम म शानदार अभिनय करे हावयं। येकर संग ही ओमन दिलीप कुमार, धर्मेंद्र अउ अमिताभ के संग केउ फिलिम म काम करे हावय। सुलोचना लाटकर ह लगभग 250 हिंदी अउ 50 ले आगर मराठी फिलिम म अभिनय करे हावय।