अंतर्राष्ट्रीय योग दिवस के तइयारी छत्तीसगढ़ म, 21 हजार लोगन होही सामिल

अंजोर.रायपुर। छत्तीसगढ़ म 21 जून के अंतर्राष्ट्रीय योग दिवस मनाने के तइयारी जोर-शोर ले चलत हावय। योग दिवस म आयोजित समारोह ल सफल बनाये खातिर छत्तीसगढ़ योग आयोग के अध्यक्ष ज्ञानेश शर्मा ह धरमपुरा कार्यालय म योग सेंटर संचालक के बिसेस बइठक लिस। बइठक म कार्यक्रम के रूप रेखा के कार्ययोजना म गोठबात करत ओमन बताइन के ए साल अंतर्राष्ट्रीय योग दिवस के राज्य स्तरीय समारोह जोरा के कृषि कॉलेज के मैदान म आयोजित करे जाही। ए दिन बड़े संख्या म लोगन छत्तीसगढ़ म योगाभ्यास करही। राज्य स्तरीय आयोजन म ए साल 21 हजार लोगन के एक संग योगाभ्यास करे के लक्ष्य हावय।

श्री शर्मा ह बताइन के पूरा देश के संग छत्तीसगढ़ म तको अन्तर्राष्ट्रीय योग दिवस समारोह पूर्वक मनाये जाही। ए साल योग दिवस के थीम ’एक विश्व एक स्वास्थ्य’ रखे गे हावय। ए दिन योग के माध्यम ले ‘हर घर आंगन योग’ के संदेश के प्रोत्साहित करिन जाही। गांव पंचायत, नगरीय निकाय के प्रमुख जगह जैसे- ऐतिहासिक, सार्वजनिक महत्ता के स्थल, जरूरी नदियों वाला जगह म जादा ले जादा भागीदारी के संग समिलहा योग अभ्यास के आयोजन करिन जाही। प्रदेस के शहर अउ गांव म अंतर्राष्ट्रीय योग दिन के कार्यक्रम आयोजित करे  जाही। आंगनबाड़ी केन्द्र के बच्चे, वृद्धा आश्रमों म रेहे वाला बुजुर्ग सहित कई नव जवान अंतर्राष्ट्रीय योग दिन समारोह म सामिल होके योगाभ्यास करही।

छत्तीसगढ़ योग-आयोग के अध्यक्ष ज्ञानेश शर्मा ह बताइन के आंगनबाड़ी अउ वृद्धाश्रम, सार्वजनिक उपक्रमों, शासन के सबो विभाग के प्रमुख ठऊर मन म तको योग के कार्यक्रम आयोजित करे  जाही। एमे सरपंच, वार्ड पार्षदों आन स्थानीय समुदाय के जनप्रतिनिधी मन, गणमान्य नागरिक स्वैच्छिक संगठन, पुलिस प्रशिक्षण केन्द्रों, आंगनबाड़ी केन्द्र, बालाश्रम, वृद्धाश्रम, दिव्यांग मन अउ उभयलिंगी मनखे मन बर संचालित संस्था मन  सामिल होही।