अंजोर.रायपुर। हरेली तिहार के दिन सुरू होइस छत्तीसगढ़िया ओलंपिक अब दूसरइया चरण जोन स्तर के सुरू 26 जुलाई ले होत हावय। एमे 8 राजीव युवा मितान क्लब के मिलाके 01 जोन बनाये गे हावय। जोन स्तर के ए प्रतियोगिता के समापन 31 जुलाई के होही। पहिली चरण म राजीव युवा मितान क्लब स्तर के प्रतियोगिता ग्रामीण अउ नगरीय क्षेत्र म 17 जुलाई ले 22 जुलाई तक आयोजित करे गे रिहिस। मुख्यमंत्री भूपेश बघेल के पहल म पाछु साल छत्तीसगढ़ के पारंपरिक खेल के प्रोत्साहित करे, खेल के प्रति जागरूकता फैलाये, खिलाड़ी ल मंच दे अउ खेल भावना के विकास करे के उद्देश्य ले सुरू करे गे छत्तीसगढ़िया ओलंपिक के अभूतपूर्व लोकप्रियता मिलीस। ग्रामीण अउ शहरी क्षेत्र म लोगन ह ए ओलंपिक म बढ़-चढ़ के हिस्सा लिस। ए साल चलत छत्तीसगढ़िया ओलंपिक म भाग ले के लेके लोगन म भारी उत्साह हावय।
आन चरण म जोन स्तर म ग्रामीण अउ शहरी क्षेत्र म आयोजित छत्तीसगढ़िया ओलंपिक प्रतियोगिता म 08 राजीव युवा मितान क्लब क्षेत्र के एक जोन बनाये जाही। ग्रामीण क्षेत्र म जोन बनाये के जुमेदारी पंचायत अउ ग्रामीण विकास विभाग के अउ शहरी क्षेत्र म नगरीय प्रशासन विभाग के डहर ले नामांकित अधिकारी ल दे हावय। मुकाबला नॉक आऊट पद्धति ले राजीव युवा मितान क्लब के विजेता भाग लेवइया अउ दल के बीच होही। ग्रामीण क्षेत्र म विजेता भाग लेवइया दल आयुवार अउ वर्गवार विकासखंड स्तरीय प्रतियोगिता म अउ शहरी क्षेत्र म विजेता भाग लेवइया दल आयुवार अउ वर्गवार नगरीय क्लस्टर स्तर के प्रतियोगिता म भाग लेही।
राजीव युवा मितान क्लब स्तर अउ जोन स्तर के समापन के बाद तीसरइया चरण विकासखंड अउ नगरीय क्लस्टर स्तर म आयोजन 7 अगस्त ले 21 अगस्त तक, चौथे चरण जिला स्तर म आयोजन 25 अगस्त ले 04 सितंबर तक, पांचवे चरण संभाग स्तर म आयोजन 10 सितंबर ले 20 सितंबर तक अउ आखरी म राज्य स्तर खेल प्रतियोगिता आयोजित होही। जेकर आयोजन 25 सितंबर ले 27 सितंबर तक होही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।