सहायक शिक्षक अउ शिक्षक पद बर न्यायालय के आदेश म पालन म डी.एड. अउ डी.एल.एड. वाला के काउंसिलिंग जारी

अंजोर.रायपुर। युवा मनला रोजगार दे के वादा पूरा करे बर स्कूल शिक्षा विभाग ह कुल 12489 पद निकाले रिहिस। व्याख्याता के 432 पद म भरती लगभग पूरा हो चुके हावय। शिक्षक के 5772 पद म काउंसिलिंग अउ दस्तावेज सत्यापन के बुता सरलग चल रिहिन हावय अउ लगभग 10 दिन म पूरा हो जाही। ये पद म बी.एड. योग्यता वाला आवेदन करइया पात्र हावय अउ उंकर भरती सरलग करे जात हावय।

सहायक शिक्षक के 6285 पद म नियुक्ति बर काउंसिलिंग सुरू जा चुके हावय। छत्तीगसद शासन व्दारा जारी विज्ञापन म सहायक शिक्षक के पद म तको बी.एड. के पात्र माने गे रिहिस, अउ ओला व्यापाम के परीक्षा म बइठे के मउका तको दे गे, फेर इही बीच अचानक दिनांक 11 अगस्त के राजस्थान राज्य ले संबंधित सिविल अपील क्र. 5068/2023 म माननीय सर्वोच्च न्यायालय ह बी.एड. के सहायक शिक्षक पद म नियुक्ति बर अपात्र घोसित कर दीस। येकर तुरते बाद माननीय उच्च न्यायालय बिलासपुर ह याचिका क्र. डब्ल्यू.पी.एस. 5788/2023 म दिनांक 21 अगस्त के सहायक शिक्षक पद बर बी.एड. योग्यता वाला आवेदन करइया के खातिर काउंसलिंग के कार्यवाही मनांहि रखे के आदेश दीस। फेर डी.एड. अउ डी.एल.एड. के काउंसलिंग म कोनो रोक नइ लगाईस। माननीय न्यायालय के ए आदेश म पालन म डी.एड. अउ डी.एल.एड. योग्यता वाला आवेदन करइया के काउंसिलिंग जारी रखे गे हावय, जेकर ले राज्य के युवा मन के लउहा ले रोजागार दे जा सके। बी.एड. योग्यता वाला आवेदन करइया के खातिर उपलब्ध विधिक उपचार के बारे म महाधिवक्ता महोदय ले मार्गदर्शन मांगे गे हावय।