चक्रधर समारोह म दिखिस छत्तीसगढ़ी संस्कृति के झलक

अंजोर.रायगढ़। संस्कृति विभाग डहर ले लौह नगरी रायगढ़ म हरेक साल के रकम ले आयोजित ए साल के चक्रधर समारोह म छत्तीसगढ़ी संस्कृति के झलक देखे ल मिलत हावय। चक्रधर समारोह म स्थानीय स्कूली छात्र-पढ़इया लइका ह सांस्कृतिक छटा बिखेरा। पढ़ईया मन ह छत्तीसगढ़ के स्थानीय संस्कृति के नृत्य के माध्यम ले मनमोहक प्रस्तुति दीस। समारोह म राउत नाचा ले लेके सुआ, ददरिया, कर्मा जइसे आने-आने स्थानीय सांस्कृतिक नृत्य के संग देश के आने-आने राज्य के ओड़िशी, गुजराती बिहू जइसे सांस्कृतिक नृत्य के झलक तको देखे के मिली। स्कूली लइका के मनमोहक प्रस्तुति के शहरवासी ह आनंद उठाया अउ लइका के उत्साहवर्धन करिन। जानबा होवय कलेक्टर तारन प्रकाश सिन्हा के पहल म ए साल चक्रधर समारोह म स्थानीय कलाकार मन के संग ही स्कूली अउ नवोदित कलाकार मन के बड़े संख्या म मउका दे हावयं।

समारोह म एमएसपी पब्लिक स्कूल के लइका ह देशभक्ति गीत भारत मां के जय बोलव रे, छत्तीसगढ़ के जय बोलव, तिरंगा झंडा लहराए जावथे, जन-गण-मंगल के धुन गावथे म छत्तीसगढ़ी नृत्य के संग मनमोहक प्रस्तुति दीस। इही रकम ले न्यू होराइजन स्कूल के लइका ह झुलना मा झूले... छत्तीसगढ़ी लोक गीत म कर्मा नृत्य के जबरदस्त प्रस्तुति दीस। कार्यक्रम के ए कड़ी म जिंदल आदर्श ग्राम्य भारती उच्चतर माध्यमिक स्कूल के स्कूली लइका ह ओडिशा के संबलपुरी नृत्य ले देखइया के दिल जीतिस।