दसवीं पास 83 नोनी मनला साफ्टवेयर इंजीनियर के फोकट म ट्रेनिंग

अंजोर.रायपुर। रायपुर सहित आसपास के जिला  के 83 नोनी के कम्प्यूटर साफ्टवेयर इंजीनियरिंग के फोकट म ट्रेनिंग जिला प्रशासन डहर ले दिलाये जात हावय। ए ट्रेनिंग ले दसवीं कक्षा पास ये युवति-महिला मन के खातिर अमेजन, नेटवेस्ट, एप्प स्क्रिप, मैक्यूरी, एक्सेंचर जइसे मल्टीनेशनल कंपनी म साफ्टवेयर इंजीनियर के जाब गारंटी के रद्दा खुल रिहिन हावय। लाभाण्डी म ये युवति-महिला मन के साफ्टवेयर इंजीनियरिंग के पूरा रकम ले फोकट म अउ आवासीय प्रशिक्षण दे जात हावय।

कलेक्टर डा. सर्वेश्वर भुरे ह लाभाण्डी के ट्रेनिंग सेंटर पहुंच के प्रशिक्षण अउ आवासीय बेवस्था के जायजा लिस। ओमन हास्टल वार्डन ले प्रशिक्षणार्थी के खातिर उपलब्ध सुविधा के पूरा जानकारी लिस अउ फेर प्रशिक्षार्थी नोनी ले तको गोठबात करिस। डा. भुरे ह प्रशिक्षण केन्द्र म महिला सुरक्षाकर्मी तैनाती के खातिर पुलिस प्रशासन के पाती भेजे के निर्देश नगर निगम आयुक्त के दिस। ओमन प्रशिक्षणार्थी के खातिर आवासीय बेवस्था अउ खानपान के बारे म तको पूछिस। डा. भुरे ह प्रशिक्षणार्थी के गुणवत्ता पूरा पौष्टिक भोजन दे के निर्देश  अधिकारी मनला दिस।