21 अक्टूबर के 'पगबंधी जोहार' म छत्तीसग​ढ़िया क्रांति सेना करही चुनाव ल लेके बड़का घोसना

अंजोर.ए। छत्तीसगढ़ विधानसभा चुनाव के शखनांद होगे हावय। सबो राजनीतिक दल मन अपन-अपन तइयारी म लगे हावय। बड़का राजनीतिक दल भाजपा अउ कांग्रेस के सरगर्मी के बीच अब छत्तीसगढ़ियावाद ल लेके मैदान म छत्तीसग​ढ़िया क्रांति सेना तको प्रत्याशी उतरे के तइयरी म हाबे। छत्तीसगढ़ म जब ले छत्तीसगढ़िया क्रांति सेना आम आदमी के हक बर जोरसोर ले आवाज बुलंद करे हावय, बाहरी आदमी मनके पोखरी ढिल्ला होगे हावय। इहां तक के बड़े पार्टी मन तको छत्तीसगढ़ी अउ छत्तीसगढ़िया मनला मउका देवत हाबे। पाछू बछर के चुनई म कांग्रेस के जीत के बड़का कारन छत्तीसगढ़िया क्रांति सेना ल तको माने जाथे। कांग्रेस ह स्थानीय नेता मनला मैदान म उतारिस जेकर फायदा उनला मिलिस।

छत्तीसगढ़िया क्रान्ति सेना के मीडिया विभाग कोति ले पाछु दिन आरो करे रिहिन के उंकर पचास विधानसभा के नाव के तइयरी होगे हावय अउ बाकी के सूची मन म बिचार होवत हाबे। अब मिले आरो के मुताबिक  छत्तीसगढ़िया क्रांति सेना तको चुनई मैदान म उतरही अउ छत्तीसगढ़ म बुढ़ा देव के सरकार बनाही। हांलकि अभी तक से साफ नइ हो पाये हाबे। बहरहाल 21 अक्टूबर के फुंडहर म होवइया 'पगबंधी जोहार' म सबो बात के फरीफरा हो जाही। यदि चुनाव के तइयारी होही तव पार्टी ह प्रत्याशी के घोसना तको कर सकत हाबे। फुंडहर म पार्टी के प्रदेशाध्यक्ष अमित बघेल के संग प्रदेशभर सेनानी मन जुरियाही अउ संझा 6:30 बजे बड़का घोसना होही।