अमित बघेल धरसीवां ले लड़ही चुनई, भाजपा के अनुज शर्मा अउ कांग्रेस के छाया वर्मा के बाढ़िस मुश्किल

अंजोर.ए। जोहार छत्तीसगढ़ पार्टी के दूसरइया सूची जारी होगे। जेमा पार्टी के प्रदेश अध्यक्ष अमित बघेल के चुनई लड़े के आरो मिले हा​बे। जोहार छत्तीसगढ़ पार्टी के महासचिव भूषण लाल साहू कोति ले जारी दूसरइया लिस्ट म अमित बघेल के अलावा शिव पैकरा, बीना साहू, चंद्रभान साहू अउ कामेश साहू के तको नाम हाबे। जानबा होवय के अमित बघेल धरसींवा विधानसभा ले आथे, ओमन के ​उहां के राजनीति ले जुन्ना नता हाबे। हालांकि ये पहली मउका होही के ओमन नवा पार्टी ले एक विधानसभा प्रत्याशी के रूप जनता के ​बीच जाही।

अमित बघेल के धरसींवा आते ही दूना मेन पार्टी के मुश्किल अउ बाढ़गे। ओमन अनुज शर्मा ल पहली ले नकारे रिहिस, लेकिन अनुज अपन लोकप्रियता के सेती लोगन के बीच म ठउर बनाये म कामयाब होगे। अइसने छाया वर्मा के संग होइसे, हालांकि बहुत लंबा ओमन के राजनीतिक सफर रेहे हाबे लोगन के मया दया पावत रेहे हाबे। लेकिन ये बीच अमित बघेल के चुनई म आये ले दोनों पार्टी बर दूभर दिन कस लागत हाबे। छाया वर्मा बर बने रसता बनत रिहिस लेकिन अब अनुज बर मुश्किल बाढ़गे। खैर अभी शुरूआत होए हाबे, पंदरा दिन म अउ घटा फरिहा जाही। काबर मुड़ पागा होही साफ हो जही।