छत्तीसगढ़ के लइका मनला नीट अउ जेईई के फोकट म कोचिंग : मुख्यमंत्री ह स्वामी आत्मानंद कोचिंग योजना के करिन शुभारंभ

अंजोर.रायपुर। मुख्यमंत्री भूपेश बघेल ह इंजीनियरिंग अउ मेडिकल के प्रतियोगी परीक्षा के खातिर स्कूल शिक्षा विभाग के नवाचारी ‘स्वामी आत्मानंद कोचिंग योजना‘ के आज अपन निवास कार्यालय ले ऑनलाईन सुरू करिन। ए योजना के तहत प्रदेस के 146 विकासखंड मुख्यालय अउ चार शहर-रायपुर, दुर्ग, बिलासपुर अउ कोरबा सहित 150 कोचिंग सेंटर के माध्यम ले सरकारी स्कूल म कक्षा 12वीं के पढ़ईया मन के फोकट म कोचिंग दे जाही। मुख्यमंत्री बघेल अउ स्कूल शिक्षा मन्त्री रविन्द्र चौबे के संग स्वामी आत्मानंद कोचिंग योजना संचालन के खातिर स्कूल शिक्षा विभाग ले समग्र शिक्षा, छत्तीसगढ़ पाठ्य पुस्तक निगम अउ ऐलन कैरियर कोचिंग इंस्टीट्यूट प्राइवेट लिमिटेड के बीच एमओयू म दस्तखत करिन।

मुख्यमंत्री भूपेश बघेल ह स्वामी आत्मानंद कोचिंग योजना के करिन शुभारंभ

मुख्यमंत्री ह ए मउका म स्वामी आत्मानंद कोचिंग योजना के संबंध म स्कूल शिक्षा विभाग डहर ले तइयार ब्रोशर के विमोचन करिन। ओमन राज्य के विकासखंड के कोचिंग सेंटर म उपस्थित लइका ले गोठबात करके योजना के संबंध म जानकारी लिस। ए बखत स्कूली लइका ह अपन बढि़या भविष्य के खातिर योजना के प्रति भरपूर खुसी के इजहार करत होइस मुख्यमंत्री अउ स्कूल शिक्षा मंत्री के प्रति आभार व्यक्त करिन।

मुख्यमंत्री भूपेश बघेल ह स्वामी आत्मानंद कोचिंग योजना के सुरू करत छत्तीसगढ़ म लइका के कैरियर बनाये के खातिर के एक अउ जरूरी घोसना करत किहिन के निकट भविष्य म पीएससी अउ आन प्रतियोगी परीक्षा के सर्वसुविधा युक्त बढि़या ऑनलाईन कोचिंग के बेवस्था तको हम सबो विकासखंड म करही।