सिनेमा। छत्तीसगढ़ी सिनेमा के लोकप्रिय अभिनेता अनुज शर्मा ह अब राजनीति म रमगे हावय। वइसे तो सुरू ले ही ओमन के बिचार ह भारतीय जनता पार्टी कोति रिहिस। भाजपा के बड़का नेतामन के संगत अउ खासकर पूर्व मुख्यमंत्री डा. रमनसिंह के लइका अभिषेक सिंह संग ओकर मेल-मुलाकात जादा रिहिस। अब अनुज शर्मा भाजपा म सामिल होके, राजनीति बर अपन आप ल समर्पित कर देहे।
अनुज शर्मा भाजपा म आते ही सरलग बड़े-बड़े नेता मनके संग दौर, सभा, आंदोलन, धरना म जोरदार तरीका ले पार्टी के झंडा उंचाये अउ विरोधी मनला ललकारे के काम करिस। अनुज ल एक कोति ले तो पूरा प्रदेस के जनता चिनथे, तेन पाके ओकर फायदा पार्टी ल होइस। दूसर कोति ले अनुज तको चारो मुड़ किंजरके अपन बर क्षेत्र चुने म लगे रिहिस। अइसे केहे जाथे के ओमन रायपुर ग्रामीण, धरसींवा, भाठापारा उक विधानसभा म चुनाव लड़े के दावेदारी करे रिहिस।
भारतीय जनता पार्टी ह जब भी कानो बड़का आदमी ल अपन पार्टी म मिलाथे तव ओला चुनाव म जरूर उतारथे। अनुज के पहिली पूर्व कलेक्टर ओपी चौधरी तको भाजपा म आइस त उहू ल चुनाव मैदान म उतारे रिहिस। अनुज जेन हिसाब ले धरसींवा विधानसभा के दौरा करत हाबे, पूरा उम्मीद हे के ओमन अब उहां ले चुनाव लड़े के मन बना डरे हाबे। अनुज शर्मा ल पार्टी तको उहें ले विधानसभ के चुनाव लड़ाही।
कलाकारी के दौर ल अनुज अतका नाम कमा डारे हावय के लोगन के भीड़ जुटाये म थोरको देरी नइ लागे। जिहां जाथे लोगन पसंद करथे। अब कला के संग राजनीति के हुनर ओमन कतका सीखे हाबे ये तो बेरा ह तय करही। फिलहाल सिनेमा के बड़का कलाकार चुनाव म अवइया हे सुवागत तो होना ही चाही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।