हेमा शुक्ला 'गुईया' म आही अमलेश नागेश के संग

अंजोर.ए। छत्तीसगढ़ी सिनेमा म अब कोन कहां ले आके सफलता के शिखर म पहुंच जही कोनो नी जाने। काबर के जेन चलगे उही सुपरस्टार। हहो.., अभी छत्तीसगढ़ म अइसने चलत हाबे, अब अमलेश नागेश ल देखव न पहिली फिलिम ले ही राहित मता के रेंग दिस। अब तो ओमन के सरलग केउ फिलिम के आरो मिलत हाबे।

मनीष मानिकपुरी के निर्देशन म बने फिलिम 'गुईया' साल के आखिर म 8 दिसंबर के रिलीज होही। ये फिलिम म एल्बम ​क्विन हेमा शुक्ला बतौर नायिका के रूप म हाबे। हेमा छत्तीसगढ़ी सिनेमा म गजब दिन ले काम करत हाबे, कई वीडियो एल्बम सोशल मीडिया म वायरल होए हाबे।

हेमा शुक्ला नया ट्रेंड के कलाकार आए जेन ल आज के युवा वर्ग पसंद करथे। हेमा शुक्ला के मन मोहक अदा बड़े पर्दा म तको दिखही, मोहित साहू के बनाये छत्तीसगढ़ी फिलिम 'गुईयां' म ओमन अमलेश नागेश के संग काम करे हाबे। अमलेश पहिली फिलिम म एल्सा घोष बर बइहा होगे रिहिस अउ येमा हेमा शुक्ला बर होही।