अंजोर.ए। प्रदेश म अब तीसरा विकल्प के रूप म 'जोहार छत्तीसगढ़ पार्टी' अपन छत्तीसगढ़ियावदी विचारधारा के संग चुनई मैदान म 31 प्रत्याशी के सूची जारी कर दे हावय। जानबा होवय के पाछु दिन फुंडहर के पगबंधी जोहार म पार्टी के नाम अउ चुनाव चिन्ह के ऐलान के बाद ही रायपुर ग्रामीण विधानसभा ले धीरेन्द्र साहू के नाव म मुहर लग गे रिहिस। बाकी 30 प्रत्याशी के नाम के आधिकारिक घोसना तको होबे। सोशल मीडिया ले मिले आरो के मुताबिक रायगढ़ ले सुनील मिंज, खरसियां ले यशवंत निषाद, कटघोरा ले सुरेन्द्र प्रसाद राठौर, लोरमी ले परसराम यादव, मुंगेली ले नोबिल नवरंग, तखतपुर ले जयचंद कश्यप, बिल्हा ले संतोष साहू, मस्तूरी ले बॉबी पात्रे, सक्ती ले तूफान सिंह चंदेल, चंद्रपुर ले सतीश पांडेय, जैजैपुर ले रामपाल कश्यप, बिलाईगढ़ ले रामेश्वर सोनवारी, कसडोल ले डॉ. देवेश वर्मा, भाटापारा ले चंद्रकांत साहू, ल प्रत्याशी बनाये गे हावय।
इही रकम ले खल्लारी ले गेंदलाल डडसेना, रायपुर ग्रामीण ले धीरेन्द्र साहू, रायपुर पश्चिम ले श्रीमती ऋचा वर्मा, रायपुर दक्षिण ले मनीष ठाकुर, अभनपुर ले यश साहू, कुरूद ले बसंत साहू, धमतरी ले निखलेश साहू, गुडरदेही ले संदीप बेलचंदन, पाटन ले मधुकांत साहू, दुर्ग शहर ले पंकत चतुर्वेदी, भिलाई नगर ले ऋतुराज वर्मा, वैशाली नगर ले योगेश साहू, अहिवारा ले अरूण गंधर्व, साजा ले राजेन्द्र पटेल, नवागढ़ ले जीतेन्द्र देशलहरा, राजनांदगांव ले मनीष देवांगन ल प्रत्याशी बनाये गे हावय।
मूलवासी मनके हक अउ आवाज ल बुलंद करत जोहार छत्तीसगढ़ पार्टी अपन विचारधारा के अनुरूप छत्तीसगढ़िया मन खातिर 44 बिन्दु म संकल्प पाती जारी करे हावय। पार्टी के महासचिव भूषण साहू कोति ले जारी पत्र के मुताबिक संपल्प पाती म रोजी रोजगार, वन संपदा, खेती-किसानी, ईलाज-पानी अऊ अस्पताल, शिक्षा-स्कूल व्यवस्था ल जोर गे हावय।
रोजी रोजगार-
1. राज्य सरकार/छत्तीसगढ़ म स्थापित केंद्र सरकार के हरेक विभाग/सार्वजनिक उपक्रम (पीएसयू)/प्राईवेट फैक्टरी अऊ व्यापारिक संस्थान मन म100% छत्तीसगढ़िया मन ल रोजगार देवाबो।2. स्थानीय भरती अधिनियम के निर्माण करबो।3. भारी उद्योग/ छोटे उद्योग/ व्यापारिक प्रतिष्ठान खोले अऊ ओमन म ठेकेदारी, माल आपूर्ति, ट्रांसपोर्टिंग करे खातिर स्थानीय छत्तीसगढ़िया मन ल प्राथमिकता देवाबो।4. कोनो भी नवा फैक्टरी/उद्योग मन ल केवल निर्धारित औद्योगिक क्षेत्र म ही खोले के अनुमति देबो। कृषि जमीन/ जंगल/भाठा/ परिया / चारागाह /दईहान / जल स्रोत मन म उद्योग नहीं खुलन देवन।5. निजी उद्योग मन म होवत शोषण ल बंद करबो, कामगार मन ल श्रम कानून के अनुसार संरक्षित करबो, 12 घंटा के बजाय 8 घंटा के ड्यूटी म फुल वेतन, सुरक्षा उपकरण/नियम कड़ाई ले पालन कराबो। दुर्घटना होय के स्थिति म न्यूनतम 50 लाख तक मुआवजा जरुर देवाबो।6. छत्तीसगढ़ म कार्यरत खनन कंपनी जईसे एसईसीएल/एनएमडीसी मन के हेड आफिस अऊ भरती कार्यालय ल छत्तीसगढ़ म लानबो।7. दुर्घटना/ बीमारी/महामारी मन म कामगार मृतक के आश्रित। ल हर हाल म एक महीना के भीतर अनुकंपा नियुक्ति जरुर देवाबो।8. आश्रित के नाबालिग होय के स्थिति म ओकर बालिग होय के तुरंत बाद नियुक्ति करबो, अऊ तब तक परिवार के जीवन-निर्वाह बर डीए बेसिक/ एक निश्चित राशि हर महीना देवाबो।9. सरकारी कार्यालय मन म प्लेसमेंट कंपनी/आऊटसोर्सिंग प्रथा ल बंद करके नियमित नियुक्ति करबो।10. कर्मचारी बीमा ईएसआईसी अऊ प्राविडेंट फंड मन ल सख्ती ले लागू करबो।11. कर्मचारी संख्या 500 ले उपर वाले संस्थान मन म कार्यस्थल म ही स्वयं के सुविधायुक्त अस्पताल अऊ चिकित्सक के उपलब्धता नियम अनिवार्य कराबो।12. जिला रोजगार कार्यालय में पंजीयन वरिष्ठता द्वारा निजी अऊ सरकारी नौकरी मन म भरती के जुन्ना प्रक्रिया ल फेर से जिंदा करबो।13. छत्तीसगढ़ ल अतरराष्ट्रीय आईटी हब अऊ एजुकेशनल हब बनाबो।14. हरेक संविदा अऊ दैनिक वेतनभोगी मन ल इंटरनल रिक्रूटमेंट के द्वारा परमानेंट करबो।विभाग के खाली पद मन ल अलग से विज्ञापन न निकाल के उंहे के संविदा कर्मी ले भरबो।
वन-संपदा-
15. वनक्षेत्र के बड़े परियोजना ले विस्थापित मूल निवासी मन ल तुरते नियाव देवाबो।16.कोनो भी मुठभेड़ अगर अदालत म फरजी साबित हो जथे त मृतक परिवार ल एक करोड़ रुपया मुआवजा देबो। जेल म फरजी तरीका ले बंद राखे गये पीड़ीत मन के पुनर्व्यवस्थापन करके पचास हजार मुआवजा देबो।17. छत्तीसगढ़ के बाढ़े तापमान अऊ हाथी समस्या ल जंगल मन के पुनर्जीवन अऊ सघन वृक्षारोपण द्वारा कमती करबो।18. जोहार छत्तीसगढ़ पार्टी हर जिला म अपन वकील राखही जौन मन गरीब मन ल उचित विधिक सहायता दीही।19. किसान मन ल उंकर निजी खेत/ मेढ़/भाठा मन म सघन वृक्षारोपण करे बर प्रोत्साहन राशि देके प्रेरित करबो ताकि बेंदरा मन घर बारी म झन खुसरंय।20. जल-जंगल-जमीन के संरक्षक स्वतंत्र न्यायिक संस्था राष्ट्रीय हरित आयोग (NGT) ल पहिली असन मजबूत करवा के ओकर क्षेत्रीय कार्यालय ल छत्तीसगढ़ लानबो।
खेती-किसानी-
21. धान के समर्थन मूल्य बढ़ा के 5200 करबो।22. लैंड बैंक के निरमान करबो। परिवार ल आर्थिक सुरक्षा के गारंटी देबो।25. रबी फसल अऊ 100% वनोपज ल घला समर्थन मूल्य म बिसाबो।24. गांव/कस्बा/शहर के पशुधन ल चराय बर अऊ आवारा किंजरे ले बचाय बर, फसल ल सुरक्षित राखे बर सरकार द्वारा वेतन देके चरवाहा मन के नियुक्ति करे जाही।25. छत्तीसगढ़ के प्राचीन सहकारी ग्रामीण व्यवस्था "पौनी-पसारी" अऊ धान बैंक "रामकोठी” के प्रणाली ल रिसर्च सहित पुनर्जीवित करबो।26. जहर मुक्त अनाज अऊ भय मुक्त खेतीहर समाज के अवधारणा ल लेके चलबो।27. नकली कीटनाशक, नकली खातू बीजहा के कारोबारी मन ल कड़ा ले कड़ा सजा देवाबो। कृषि दवाई के सप्लाई एजेंसी मन केवल सरकारी होही। मूलभूत/आवश्यक दवाई के कीमत सरकारी नियंत्रण म राख के दवा स्टाक सरकारी केंद्र म उपलब्ध कराबो।28. छत्तीसगढ़ के खदान ले निकले कच्चा माल ले बने उत्पाद जईसे सीमेंट/सरिया/रेती मन के कीमत म छत्तीसगढ़िया मन ल सबसिडी देहे के प्रावधान बनाबो।29. मल्टीलेयर सिंचाई व्यवस्था के विस्तार/विकास करके तीन फसलीय नगदी उपज के द्वारा किसानी ल आर्थिक रुप ले मजबूत करबो।30. गोबर खरीदी के बजाय छेना खरीदी करबो। दाह संस्कार म लकड़ी ल प्रतिबंधित करके शहरी क्षेत्र म घला पुरातन छत्तीसगढ़िया पद्धति 565 + छेना अऊ अनुपयोगी फाटा/बईला गाड़ी के चक्का के आरा पुठी के द्वारा करे के नियम बनाबो।
ईलाज-पानी अऊ अस्पताल-
31. राज्य के हरेक सरकारी अस्पताल मन ल ऐम्स के मॉडल अपना के अपग्रेड करबो।32. निजी हो या शासकीय, चिकित्सा सेवा ल दुर्घटनाग्रस्त अऊ महामारी ग्रसित मरीज मन बर पूर्णतया निशुल्क करवाबो।33. हर पंद्रह किलोमीटर के बीच "गुड़ी अस्पताल" बनाबो जेमा पैथालॉजी लैब अऊ डायग्रोस्टिक सेंटर बनही। खून , पेशाब जांच एक्सरे, सोनोग्राफी आदि के सुविधा रही।34. स्वास्थ्य बजट दोगुना कर देबो।
शिक्षा-स्कूल व्यवस्था-
35. जुन्ना शिक्षा पद्धति म आज के हिसाब ले सुधार करके पुनः लागू करबो। हर कक्षा में परीक्षा लिये जाही।36. सीजी बोर्ड ल सीबीएसई बोर्ड ले बेहतर बनाबो।37. शिक्षाबजट ल दोगुना करबो।38. हरदिन खेल के पीरियड सुनिश्चित करके, खेल बजट बढ़ाके कॉमनवेल्थ/एशियाड/ओलंपिक के पदक तालिका म छत्तीसगढ़िया खिलाड़ी के नाम दर्ज कराबो।
विविध महत्वपूर्ण घोषणा-
39. नशामुक्त छत्तीसगढ़ के निरमान करबो।40. .शभ्रष्टचार मुक्त छत्तीसगढ़ के निर्माण करबो।41. दस हजार करोड़ के संपूर्ण शासकीय निर्माण विभाग के ठेका पद्धति ल रोजगार पद्धति म तब्दील कर देबो।42. चिटफंड कंपनी म धोखाधड़ी म फंसे लाखों छत्तीसगढ़िया निवेशक अऊ अभिकर्ता मन ल ए दारी सिरतोन के नियाव देवाबो।43. छत्तीसगढ़ म संचालित दूरदर्शन अऊ आकाशवाणी केंद्र मन ल विकसित करके कार्यक्रम मन म छत्तीसगढ़ियापन के मिठास लानबो, हरेक छत्तीसगढ़िया कलाकार मन ल हर हाल म प्लेटफार्म देवाबो।44. ईको टूरिज्म अऊ होमस्टे के द्वारा, हमर हजारों बरिस पहिली के ऐतिहासिक स्थल मन ल दुनिया ल देखा के, प्रचार प्रसार म खर्च करके राज्य के राजस्व ल कई गुना बढ़ाय के उदीम करबो।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।