छत्तीसगढ़ के मुख्यमंत्री... रमन, रेणुका, अरूण या कोनो अऊ?

अंजोर.ए। छत्तीसगढ़ म ​उरके चुनई के बाद अब नवा सरकार के मुखिया के अगोरा हावय। चुनई के नतीजा 3 दिसंबर के आगे रिहिस फेर अभी तक कोन होही मुख्यमंत्री ये बात के फरीफरा नइ होहे। प्रदेस म जनता कोति ले मिले जनाधार के सम्मान करत भूपेश बघेल अपन पद ले इस्तीफा दे दिस।

BJP-54, INC-35, GGP-1 परिमाण के बाद, भारतीय जनता पार्टी के सरकार प्रदेस म 5 बछर बाद फेर बनही। 54 सीट जीेते के बाद कोन होही मुखिया इही बात के गुनान चलत हाबे। कारन के छत्तीसगढ़ म चुनई के बेरा कोनो अइसे चेहरा नइ रिहिस जेला आगू रखके चुनई लड़े, अउ प्रदेस म तको आन राज सही भाजपा म प्रधानमंत्री नरेन्द्र मोदी के नाम म चुनई म बड़का जीत हासिल करिस। अब कोन होही मुख्यमंत्री ये बात घलोक मोदी ही तय करही।

छत्तीसगढ़ के राजनीति ल देखे जाए तव कई बड़का नेता मन ए पइत जीते हावय, जेमन के कई पइत मंत्री रेहे हाबे। कुछ नवा चेहरा तको हाबे जे मनला मंत्री बनाये के गोठ चलत हाबे। बहरहाल मुख्यमंत्री के बात करे जाए तो रमन सिंह, रेणुका सिंह, अरूण साव, विष्णुदेव साय, ओमप्रकाश चौधरी के नाम के चर्चा चलत हाबे। या कोनो अऊ भी हो सकत हाबे? नेता मनके दिल्ली दरबार म हाजरी के बाद अब दिल्ली कोति ले पर्यवेक्षक भेजे गे हावय, जेन मन इहां के विधायक मनले गोठबात करही अउ एक नाम म अपन मोहर लगाही।