प्रधानमंत्री नरेन्द्र मोदी के उपस्थिति म मुख्यमंत्री विष्णु देव साय अउ मंत्रिमंडल के सदस्य लेही शपथ

राजधानी रायपुर के साइंस कॉलेज मैदान म 13 दिसंबर  मंझनिया 2 बजे के होही शपथ ग्रहण समारोह

अंजोर.रायपुर। प्रधानमंत्री नरेन्द्र मोदी के गरिमामय उपस्थिति म छत्तीसगढ़ के नवा मुख्यमंत्री विष्णु देव साय अउ उंकर मंत्रिमंडल के सदस्य 13 दिसम्बर के मंझनिया 2 बजे राजधानी रायपुर के साइंस कॉलेज मैदान म शपथ ग्रहण करही।

कार्यक्रम म केन्द्रीय गृहमंत्री अमित शाह, भाजपा के राष्ट्रीय अध्यक्ष जे. पी. नड्डा, केन्द्रीय मंत्री डॉ. मनसुख मांडविया, छत्तीसगढ़ प्रदेस प्रभारी ओम माथुर, सह प्रभारी नितिन नबीन सहित केऊ राज्य के मुख्यमंत्री अउ वरिष्ठ नेता उपस्थित रइही।

शपथ ग्रहण समारोह के खातिर तीन बड़का मंच बनाए हावयं, जेमा बीच के मंच म शपथ ग्रहण होही अउ एक तनि अतिविशिष्ट आमंत्रित मनखे मन अउ दूसरी तनि नवनिर्वाचित विधायक के खातिर मंच बनाये जात हावय। येकर संग ही कार्यक्रम जगह म खास पहुना मन, मीडिया प्रतिनिधि मन अउ आम जनता के बइठे के खातिर आने-आने सेक्टर बनाए जात हावयं। जादा ले जादा लोगन शपथग्रहण के देख सके येकर खातिर एल.ई.डी. स्क्रीन तको लगाये जा रेहे हावय।

आयोजन जगह म मंच निर्माण, बइठक व्यवस्था, सुरक्षा व्यवस्था, गाड़ी के पार्किंग, विद्युत व्यवस्था, फायर ब्रिगेड ,चिकित्सा व्यवस्था, पेयजल व्यवस्था, शौचालय बेवस्था उक के खातिर संबंधित विभागीय  अधिकारी मनको निर्देशित करे गे हावय। मैदान म 50 हजार ले जादा लोगन के बइठक बेवस्था के तइयारी चलत हावयं। सुरक्षा बेवस्था बर लगभग 1000 पुलिस जवान तैनात करे  गे हावयं। रायपुर शहर के चौक-चौराहा, बस स्टैंड, रेलवे स्टेशन, एयरपोर्ट उक आन जगह म सघन चेकिंग अभियान जारी हावय।