धान के बोनस बाटे खातिर मुख्य सचिव ह कलेक्टर मन के लिस बइठक, 25 दिसंबर के आही जुन्ना पइसा किसान के खाता म

अंजोर.रायपुर। मुख्यमंत्री विष्णु देव साय के निर्देश म मुख्य सचिव अमिताभ जैन ह मंत्रालय महानदी भवन ले राज्य के संभागायुक्त अउ कलेक्टर मन के वीडियो कॉन्फ्रेंस ले बइठक लिस। बइठक म प्रधानमंत्री नरेन्द्र मोदी जी के गारंटी के परिपालन म राज्य के किसान भाई के बाकी धान बोनस के रकम के भुगतान अउ विकसित भारत यात्रा संकल्प यात्रा अउ प्रधान मंत्री आवास योजना के संबंध म जरूरी दिशा-निर्देश दे हावयं।

मुख्य सचिव ह अवइया 25 दिसम्बर के पहिली प्रधानमंत्री स्वर्गीय अटल बिहारी बाजपेयी के जनम दिन के मउका म आयोजित सुशासन दिवस के तइयारी अउ घोसना पाती के परिपालन म दू साल के बाकी धान के बोनस रकम बाटे के संबंध म  अधिकारी मनला जरूरी कार्यवाही सुनिश्चित करे के निर्देश दिस। मुख्य सचिव ह किहिन हावय के धान बोनस बाटे के कार्यक्रम नवा सरकार के सबले जरूरी कार्यक्रम हावय। कार्यक्रम के सफलता के खातिर जिला  अधिकारी मनला पूरा सर्तकता, गंभीरता अउ तत्परता ले बुता करे ल किहिन हावय।

मुख्य सचिव ह प्रधानमंत्री घर योजना के पात्र हितग्राही मन के लाभान्वित करे के खातिर जरूरी कार्यवाही करे के तको निर्देश दिस। जानबा होवय के छत्तीगसढ़ म 18 लाख हितग्राही मन लाभान्वित करे जाही। मुख्य सचिव ह विकसित भारत संकल्प यात्रा म आने-आने ठऊर मन म आयोजित शिविर म राष्ट्रीय कार्यक्रम के तहत जादा ले जादा हितग्राही मन के लाभान्वित करे ल किहिन हावय। ए मउका म पंचायत अउ ग्रामीण विभाग के अपर मुख्य सचिव सुब्रत साहू, कृषि विभाग के सचिव डॉ. कमलप्रीत सिंह अउ सहकारिता विभाग के सचिव हिमशिखर गुप्ता सहित विभागीय सचिव अउ वरिष्ठ अधिकारी उपस्थित रिहिन।