पुरखा सियान मेहतर राम साहू के ‘सुरता’ म जुरियाही प्रदेशभर के साहित्यकार, रायपुर के प्रेस क्लब म होही बड़का आयोजन

अंजोर। छत्तीसगढ़ के मूर्धन्य साहित्यकार, गीतकार स्व. मेहतर राम साहू के पुण्य तिथि के मउका म मेहतर राम साहू सृजन संस्थान बागबाहरा, महासमुंद डहर ले ‘सुरता’ कार्यक्रम के आयोजन करे गे हावय। ये मउका म सम्मान समारोह, पुस्तक विमोचन अउ कवि सम्मेलन के आयोजन करे गे हावय। मिले आरो के मुताबिक जलसा के आयोजन रायपुर के प्रेस क्लब म 25 दिसंबर के बिहनिया 11 बजे ले आयोजित करे गे हावय।

कार्यक्रम म माई पहुना के रूप म वरिष्ठ साहित्यकार डॉ. बिहारी लाल साहू, अध्यक्षता भाषाविद् डॉ. चितरंजन कर, खास पहुना पद्मश्री अनुप रंजन पांडेय, रामेश्वर शर्मा, दुर्गा प्रसाद पारकर अउ देवधर महंत होही। कार्यक्रम के पहिली सत्र म पुस्तक विमोचन होही जेमा ‘कँउवा लेगे कान ल’ श्री मेहतर राम साहू के व्यंग्य संग्रह विमोचित होही। तेकर पाछू सम्मान समारोह होही जेमा मेहतर राम साहू सम्मान- शिव निश्चिंत रायपुर, डॉ. नारायण लाल परमार सम्मान- वीरेन्द्र सरल, डॉ. प्रभंजन शास्त्री सम्मान- चंद्रहास साहू, हरिकृष्ण श्रीवास्तव सम्मान- ईश्वर साहू, पी.एल.कोरी सम्मान- पूरन जायसवाल, साहित्य संदेश सम्मान- साकेत साहित्य समिति सुरगी राजनांदगांव ल दिये जाही।

कार्य्रकम के दूसरइया सत्र म छत्तीसगढ़ के मशहूर लोक गायक मनले भेट मुलाकात होही जेमा महादेव हिरवानी, सुनील सोनी, अनुराग शर्मा, विवेक शर्मा उक मनके सुमधुर स्वर ले लोक गीत संगीत के बानगी के संग जुरियाए कवि मन कोति ले काव्यपाठ के आयोजन करे गे हावय।

जानबा होवय के मेहतर राम साहू सृजन संस्थान बागबाहरा, महासमुंद कोति ले छत्तीसगढ़ के मूर्धन्य साहित्यकार, गीतकार स्व. मेहतर राम साहू के सुरता म जबर जलसा पाछू केउ बछर ले गुरूजी के जनमभुइंया म होवत रिहिसे। एसो रायपुर के मोती बाग चउक के प्रेस क्लब सभागार म जोंगे गे हावय जेमा प्रदेशभर के नेवरिया, सियनहा सबो साहित्य प्रेमी, कला अनुरागी मन जुरियाही।