अमित शाह के दुलरवा मुख्यमंत्री विष्णुदेव अउ ओपी चौधरी के रायगढ़ म रोड शो, जगह-जगह गजमाला अउ पुष्पवर्षा ले जबर स्वागत

अंजोर.रायगढ़। चुनई के पहिली रायगढ़ के सभा म देश के गृह मंत्री अमित शाह ह लोगन ले वादा करे रिहिन के येमन ला चुवई म जीताव हम बड़े आदमी बना देबो। अब विष्णुदेव साय अउ ओपी चौधरी जीतगे अउ सरकार तको बनगे तव सिरतोन म उन दूनो ल अमित शाह ह बड़का आदमी बना दिस। एक मुख्यमंत्री बनिस अउ दूसर ल कैबिनेट मंत्री बनाये गे हावय। दूनों बड़का आदमी मन सांस्कृतिक नगरी रायगढ़ म रोड शो करे खातिर पहुंचे हावय। रायगढ़ के जनता उनकर माला पहिना के स्वागत करिन हावय। जगह-जगह गजमाला अउ पुष्पवर्षा ले मुख्यमंत्री विष्णु देव साय के तको जबर स्वागत होवथे। नंदन-वंदन-अभिनंदन के नारा ले पूरा रोड शो गूंजत हावय।

मुख्यमंत्री साय पाछु दू दशक ले रायगढ़ लोकसभा के सांसद हावयं अउ इहां के लोगन ले उंकर गहरा आत्मीयता हावय। वो रायगढ़ निवासी मन के सुख-दुख म सामिल होवत रिथें अउ दिल्ली अउ रायपुर दुनों ही जगह म रायगढ़ के जनता के हित के आवाज उठात रिथें। रायगढ़ के जनता आज आत्मीय भाव ले उंकर स्वागत के खातिर उतरे हावय। संग म ओपी चौधरी जोन पहिल पइत रायगढ़ ले विधायक के रूप म जीत के विधानसभा पहुंचे हावय, येकर पहिली ओमन ल खरसींया ले हारे रिहिन। ये पइत ओमन बड़का जीत के संग राज सरकार में मंत्री तको बने हावय। रायगढ़ के जनता बर बड़का खुशी के बात हाए के मुख्यमंत्री के संग बड़का विभाग के मंत्री उंकर जिला ले आथे।