अंजोर.ए। एनवी एंटरटेनमेंट के बैनर तरी बने छत्तीसगढ़ी फिलिम ‘तही बनबे मोर दुल्हनिया’ एसो के नवा बच्छर म 19 जनवरी 2024 ले प्रदेश के सिनेमाघर म रिलीज होवत हाबे। फिलिम के निर्माता अउ निर्देशक हाबे नीरा वर्मा अउ कहानी तको उंकरे लिखे हावय। फिलिम म हीरो दिलेश साहू अउ हिरोइन अनिकृति चौहान हे, संग म जीत शर्मा, पुष्पेन्द्र सिंह, उपासना वैष्णव, अनिल शर्मा, संगीता निषाद अउ संतोष निषाद के तको अहम भूमिका हाबे। एसोसिएट डायरेक्टर कौशल उपाध्याय अउ अनिरुद्ध सुनील वर्मा, सहायक निदेशक सुशील श्रीवास्तव, अनुपमा मनहर, राजू नागरची अउ संगीत सुनील सोनी, तोशांत कुमार, मोनिका वर्मा अउ डीजे अस विल दे हावय। कोरियोग्राफी करे हाबे हेमांशु कुमार अउ रोज़लिन डैश ह डीओपी पप्पू सिंह राजपूत रिहिन।
सोशल मीडिया म ट्रेलर के संग गाना मन तको धूम मचावत हाबे। खास करके सॉवर चेहरा तोर नीक नीक लागे गोरी तोर ले मया के करार हे..., सज सवांर के मेकअप छबड़के हाथ म महंगा मोबाईल धरके, आंखी म चश्मा, हाथ म घड़ी लागये बने करे हाबे खर्चा, दिखथे लाल मिर्चा काकर फड़वाही पर्चा। येकरे संग टाइटल गीत ‘मां कसम गोरी वो तही बनबे मोर दुल्हनिया’ खूब चर्चा म हाबे।
दिलेश अउ अनिकृति के फिलिम म एक्शन नइ होही अइसे हो नइ सके, जम के धुलाई होही। चक्कू-छूरी संग दनादान कुचरई-पटकई ट्रेलर म परगट दिखत हाबे। जीत शर्मा, पुष्पेन्द्र सिंह अउ अनिल शर्मा के रेंधियाही म उपासना वैष्णव अउ संगीता निषाद के ठोली-बोली ह कहानी म गजब जीव पार देहे। एक्शन, रोमांस के बीच म थोकुन गुदगुदाये के उदीम संतोष निषाद मन कोति ले तको होवाथाबे। कुलमिलाके फिलिम पैसा उसूल होही।
सबले बड़े बात फिलिम के निर्माता अउ निर्देशक नीरा वर्मा जी के हाबे जोन एक महिला होके अतेक बड़का फिलिम ल बहुत ही शानदार तरीका ले पर्दा तक लावत हाबे। वइसे भारतीय सिनेमा म कई झिन महिला निर्माता निर्देशक सफल होए हाबे, फेर छॉलीवुड म महिला निर्माता निर्देशक के गिने चुने नाम हाबे। जे मुताबिक ट्रेलर हावय लोगन नीरा वर्मा जी के काम ल गजब मन करत हाबे। उंकर बूता के अउ जादा जानकारी तो पूरा फिलिम देखे के बात जान पाबो जब 19 जनवरी 2024 के ‘तही बनबे मोर दुल्हनिया’ रिलीज होही। तव फिलिम देखे बर टाकीज जरूर आहू, भुलाहू झन।
- फिल्म: तही बनबे मोर दुल्हनिया
- प्रोडक्शन हाउस: एनवी एंटरटेनमेंट
- निर्माता: नीरा वर्मा
- सह निर्माता: संजय लाल
- क्रिएटिव प्रोड्यूसर: ज्योतिरादित्य वर्मा
- निर्देशक/कहानी: नीरा वर्मा
- स्टार कास्ट: दिलेश साहू, अनिकृति चौहान, जीत शर्मा, पुष्पेन्द्र सिंह, उपासना वैष्णव, अनिल शर्मा, संगीता निषाद, संतोष निषाद
- संपादक: ज्योतिरादित्य वर्मा, अमित मंडोल, राजेश कुमार
- डीओपी: पप्पू सिंह राजपूत
- एसोसिएट डायरेक्टर: कौशल उपाध्याय, अनिरुद्ध सुनील वर्मा
- सहायक निदेशक: सुशील श्रीवास्तव, अनुपमा मनहर, राजू नागरची
- संगीत: सुनील सोनी, तोशांत कुमार, मोनिका वर्मा, डीजे अस विल
- कोरियोग्राफर: हेमांशु कुमार, रोज़लिन डैश
- पोशाक: तारिणी दिबे
- एक्शन: आनंद शेट्टी
- वीएफएक्स: द ब्लू लैंटर्न इफेक्ट्स
- प्रोडक्शन प्रभारी: दिकेश और नितिन
- डीआई: प्राइम फोकस
- प्रदर्शन: 19 जनवरी 2024
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।