नवा सरकार के मंत्रिपरिषद के बइठका म तीन बड़का फइसला

राज्य सेवा परीक्षा-2021 के जांच केन्द्रीय अन्वेषण ब्यूरो करही

शासन डहर ले किसान मन ले 21 कोंटल धान के खरीदी होही

जनवरी-2024 ले अवइया 5 साल तक फोकट म खाद्यान्न बाटे जाही

अंजोर.रायपुर, 03 जनवरी। मुख्यमंत्री विष्णु देव साय के अध्यक्षता म मंत्रालय महानदी भवन म मंत्रिपरिषद के बइठक आयोजित होइस। बइठक म केउ जरूरी फइसला होइस-

1. राज्य के युवा मन के हित म राज्य शासन डहर ले छत्तीसगढ़ लोक सेवा आयोग डहर ले आयोजित राज्य सेवा परीक्षा-2021 के संबंध म मिले अनियमितता के शिकायत के ओढ़र म विस्ता्र ले जाँच बर केन्द्रीय अन्वेषण ब्यूरो ल प्रकरण पठोय  जाये के फइसला लिस। छत्तीसगढ़ लोक सेवा आयोग डहर ले राज्य सेवा परीक्षा-2021 के ले 12 विभाग के 170 पद म भरती के खातिर चयन सूची जारी करे गे हावय।

2. मंत्रिपरिषद के बइठक म किसान मन के हित म एक बड़ा फइसला लेवत होइस खरीफ विपणन साल 2023-24 म समर्थन कीमत म प्रदेस के किसान मन ले प्रति एकड़ अधिकतम 21 कोंटल धान खरीदी (लिंकिंग सहित) करे के फइसला लिस हावय। मंत्रिपरिषद के ए फइसला ले राज्य शासन डहर ले किसान मन ले 21 कोंटल धान खरीदी के वायदा पूरा होगे हावय। जानबा होवय के धान खरीदी के ये वायदा प्रधानमंत्री नरेन्द्र मोदी के गारंटी म तको शामिल हावय।  

 

3. छत्तीसगढ़ सरकार ह राज्य के अंत्योदय अउ प्राथमिकता राशनकार्डधारी परिवार के हित म बड़ा फइसला लेवत होइस ओला  अवइया पांच साल तक फोकट म खाद्यान्न बाटे के फइसला लिस हावय, येकर ले राज्य के 67 लाख 92 हजार 153 राशनकार्डधारी परिवार लाभन्वित होही अउ ओला अवइया 5 साल तक राशन दुकान ले फोकट म चाउंर मिलही। राष्ट्रीय खाद्य सुरक्षा अधिनियम-2013 के तहत जारी राशन कार्ड म जनवरी-2024 ले अवइया 5 साल तक फोकट म खाद्यान्न बाटे के समान ही छत्तीसगढ़ खाद्य अउ पोषण सुरक्षा अधिनियम-2012 के तहत जारी अंत्योदय अउ प्राथमिकता राशनकार्ड म फोकट म खाद्यान्न बाटे के फइसला लिस हावय।