कौशल्या धाम चंदखुरी म होही बड़का रामोत्सव, लोक कलाकार राकेश तिवारी के प्रस्तुति

Grand Ramotsav will be organized in Kaushalya Dham Chandkhuri

अंजोर.ए। अयोध्या म रामलला परान प्रतिष्ठा के पावन मउका म चंदखुरी के कौशल्या धाम म 22 जनवरी के संझा के रामोत्सव के बड़का आयोजन होही। संस्कृति अउ पर्यटन मंत्री बृजमोहन अग्रवाल के मुख्य आतिथ्य अउ सांसद सुनील सोनी के अध्यक्षता म आयोजित ए कार्यक्रम म छत्तीसगढ़ के लोक कलाकार मानस गायन अउ भक्तिमय सांस्कृतिक कार्यक्रम के प्रस्तुति दिही।

छत्तीसगढ़ शासन के पर्यटन विभाग डहर ले आयोजित करे  जात बड़का रामोत्सव के आयोजन महतारी कौशल्या धाम परिसर म संझा 5:30 बजे ले सुरू होही। ए मउका म बिसेस डाक टिकिट विमोचन करे जाही। छत्तीसगढ़ के परसिध लोक कलाकार राकेश तिवारी अउ संगी डहर ले राम वन गमन नृत्य नाटिका के प्रस्तुति कार्यक्रम म दिही। येकर अलावा श्रीमती गोपा सान्याल अउ संगी डहर ले राम भजन, श्रीमती अल्का चंद्राकर अउ संगी डहर ले भजन, जसगीत अउ लोकगीत के संग ही केऊ मानस मंडली डहर ले मानस गायन प्रस्तुत करे  जाही।