श्री रामलला के प्राण प्रतिष्ठा के दिन छत्तीसगढ़ म रइही आधा दिन छुट्टी

अंजोर.ए। अयोध्या म रामलला के परान प्रतिष्ठा के पावन मउका म छत्तीसगढ़ म 22 जनवरी के आधा दिन के सरकारी छुट्टी रइही। मुख्यमंत्री विष्णु देव साय के घोसना के परिपालन म छत्तीसगढ़ शासन के सामान्य प्रशासन विभाग डहर ले ए आशय के आदेश जारी करके दे हावय।

Half day holiday in Chhattisgarh on the day of Shri Ram Lalla consecration

मुख्यमंत्री विष्णु देव साय ह किहिन के छत्तीसगढ़ ले भगवान श्रीराम के गहरा नाता रिहिन हावय। छत्तीसगढ़ उंकर ननिहाल हावय। भगवान श्रीराम अयोध्या म जन्मे, उंकर महतारी कौशल्या के जनम छत्तीसगढ़ म होइस हावय। ए रकम ले प्रभु श्रीराम छत्तीसगढ़ के भांचा हावयं। वनवास काल के 14 साल म ले 10 साल ओमन छत्तीसगढ़ के जंगल म व्यतीत करे रिहिस। प्रभु राम के महतारी शबरी ह शिवरीनारायण म चख-चख करके मीठे बेर खिलाएं रिहिस। वो छत्तीसगढ़ के जन-जन के मन म रचे-बसे हावयं।

साय ह किहिन के अयोध्या म हो रेहे रामलला के परान प्रतिष्ठा ले पूरा छत्तीसगढ़ हर्षित हावय। 22 जनवरी के आधे दिन मंझनिया 2.30 बजे तक राज्य के सबो सरकारी कार्यालय अउ संस्था मन म सामान्य छुट्टी रइही, ताकि छत्तीसगढ़ के लोगन तको रामलला के परान प्रतिष्ठा महोत्सव के आनंद ले सकें अउ परब मना सकें। ओमन किहिन के प्रदेस के मंदिर म अच्छा साज-सज्जा करे गे हावय अउ आने-आने रकम ले के धार्मिक आयोजन तको चलत हावयं।