अंजोर.रायपुर,12 जनवरी। राजधानी रायपुर के बूढ़ा तरिया परिसर ले लगे जे. आर. दानी स्कूल के पढ़इया लइका ल युवा दिवस के बड़े सौगात मिले हावय। पुरानी बस्ती अउ सुदंर नगर के तनि ले स्कूल आने वाला पढ़इया लइका के अब बूढ़ा तरिया ले लगे गेट ले स्कूल म प्रवेश करे के सुविधा मिले हावय। स्कूल शिक्षा मंत्री बृजमोहन अग्रवाल ह स्वयं बूढ़ा तरिया के तनि के गेट के ताला खोलके पढ़इया लइका के युवा दिवस के उपहार दे हावय।
जानबा होवय के दानी स्कूल के पढ़इया लइका डहर ले लम्बा समय ले स्कूल ले बूढ़ा तरिया के कोति रद्दा के खोले के मांग के जात रिहिस। गेट के ताला खुलते ही पढ़इया लइका के चेहरे खिल उठे। मउका म खुसी के माहौल छा गे। कुछ साल पहिली बूढ़ातालाब के सौंदर्यीकरण होए के बाद ले दानी गर्ल्स स्कूल अउ डिग्री गर्ल्स कॉलेज के पाछु वाला बायपास सड़क के बंद कर दे गे रिहिस। संग ही दानी स्कूल के बूढ़ा तरिया के तनि खुले वाला गेट बंद करके उहां दीवार खड़ी करके दे गे रिहिस। जेकर सेती दानी स्कूल, डिग्री गर्ल्स कॉलेज, काली बाड़ी स्कूल, एससी-एसटी हॉस्टल के पढ़ईया मन के परेशानी के सामना करे बर परत रिहिस। जेला लेके पढ़इया लइका म नाराजगी रिहिस। ए मुद्दा म पढ़इया लइका डहर ले कई बार विरोध प्रदर्शन तको करे गिस रिहिस। मंत्री बृजमोहन अग्रवाल ह पहिली म वो रद्दा के सुरू करवाये अउ स्कूल गेट खुलवाने के वादा करे रिहिस, जेला ओमन पूरा कर दे हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।