अंजोर.सुकमा। नवाचारी शिक्षक समूह छत्तीसगढ़ टीम डहर ले राष्ट्रीय नवाचारी शिक्षा रत्न सम्मान सह शैक्षिक समिट 2023 के आयोजन करे गिस। ए बड़का अउ शानदार कार्यक्रम के आयोजन जिला शिक्षा अउ प्रशिक्षण संस्थान रायपुर छत्तीसगढ़ म 28 जनवरी 2024 के आयोजित होइस। जेमा पूरा छत्तीसगढ़ राज्य ले लगभग 150 शिक्षक ल सम्मानित करे गिस। संग ही शिक्षक मन के बुता के प्रस्तुति होइस हावय।
ए बड़का कार्यक्रम म सुकमा जिला ले श्रीमती परिणीता कश्यप, श्रीमती सरिता यादव अउ कोमल सिंह ठाकुर के उंकर उत्कृष्ठ बुता के खातिर परमान पत्र, मेमोंटो, पेन भेंट करके सम्मानित करे गिस। ए गरिमामयी कार्यक्रम म पहुना के रूप म राज्य परियोजना कार्यालय ले सहायक संचालक डॉ एम सुधीश, जिला शिक्षा अधिकारी हिमांशु भारती, रायपुर जिला डी.एम.सी. डी एस पटले, जिला शिक्षा अउ प्रशिक्षण संस्थान रायपुर ले डॉ एस के जैन, एल के वर्मा एव डॉ नवनीता सिंह सहित समूह प्रमुख संजीव कुमार सूर्यवंशी उपस्थित रिहिस। ए कार्यक्रम के सफल आयोजन के खातिर सुकमा जिला के टीम ले श्रीमती वैशाली झंवर अउ श्रीमती जयमाला के सतत सहयोग मिलिस।
समूह प्रमुख अउ जिला टीम ह बताइन के कई चरण के बाद अवार्ड के खातिर छत्तीसगढ़ राज्य सहित आन राज्य के शिक्षक मन के चयन होइस हावय। पूरा देश ले 700 ले तको जादा नॉमिनेशन मिले रिहिस जेला स्कूटनी अउ शॉर्टलिस्ट करके चयन समिति डहर ले संबंधित शिक्षक मन के साक्षात्कार लिस गे अउ सबंधित ले उंकर कार्य के परमान म दस्तावेज मांगे गे हावयं। दस्तावेज के उच्च चयन समिति अउ जिला टीम के प्रमाणीकरण के पाछु चयन सूची जारी करे हावय। जेमा ग्राउंड लेवल म उत्कृष्ट बुता करे वाला शिक्षक सामिल हावयं अउ जेला राष्ट्रीय नवाचारी शिक्षा रत्न सम्मान 2023 ले सम्मानित करे गिस।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।