गणतंत्र दिवस के मउका म राजभवन म होही स्वागत समारोह

अंजोर.रायपुर, 15 जनवरी। गणतंत्र दिवस के मउका म 26 जनवरी 2024 के राज्यपाल विश्वभूषण हरिचंदन के गरिमामय उपस्थिति म राजभवन म संझा 5:15 बजे ले ‘‘स्वागत समारोह‘‘ के आयोजन करे जाही। जेमा पद्मश्री, पद्मभूषण ले सम्मानित राज्य के नागरिक, जनप्रतिनिधी सहित गणमान्य नागरिक ल आमंत्रित होही।

राजभवन म गणतंत्र दिवस के मउका म संध्याकाल म ‘एट होम फंक्शन‘ कार्यक्रम आयोजित करे जाही। ए कार्यक्रम के तइयारी के खातिर राज्यपाल के सचिव अमृत कुमार खलखो ह आने-आने विभाग के बइठक लिस। ओमन संबंधित  अधिकारी मनको जरूरी दिशा-निर्देश दिस।

गणतंत्र दिवस समारोह के बखत राजभवन परिसर अउ आस-पास के साफ-सफाई, रोशनी अउ झालर व्यवस्था, ट्रैफिक, सुरक्षा अउ कानून व्यवस्था, पार्किग व्यवस्था, विद्युत व्यवस्था, नेवता पाती के मुद्रण अउ बाटे अउ आन बेवस्था के संबंध म सबो जरूरी निर्देश दिये गिस।

बइठक म राज्यपाल के विधिक सलाहकार राजेश श्रीवास्तव, उपसचिव अउ विधि अधिकारी श्रीमती नीरू सिंह, रायपुर नगर निगम आयुक्त अविनाश मिश्र सहित राजभवन के अधिकारी अउ रायपुर कलेक्टोरेट, लोकनिर्माण, बिजली, उद्यानिकी, आयुष विभाग के अधिकारी अउ कर्मचारी उपस्थित रिहिस।