अंजोर.रायपुर, 11 जनवरी। धार्मिक न्यास अउ धर्मस्व, पर्यटन अउ संस्कृति मंत्री बृजमोहन अग्रवाल ह अयोध्या म रामलला परान प्रतिष्ठा के पावन मउका म 22 जनवरी के छत्तीसगढ़ के सबो सरकारी अउ गैर सरकारी स्कूल, कॉलेज म छुट्टी के घोसना करिस।
श्री अग्रवाल ह किहिन के प्रधानमंत्री नरेंद्र मोदी जी के गारंटी के तहत छत्तीसगढ़ के दरस करइया ल ‘‘श्री रामलला दरसन योजना’’ के तहत अयोध्या ले जाये जाही। येकर खातिर छत्तीसगढ़ सरकार इंडियन रेलवे एण्ड टूरिज्म कार्पोरेशन ले अनुबंध करके एक रेल बुक करही जेन सप्ताह म एक दिन चलही। जेमा एक बार म 850 ले 1000 दरस करइया अयोध्या म प्रभु राम के दरसन करे बर सकही। रेल म बुजुर्ग अउ दिव्यांग के बिसेस धियान रखे जाही। उंकर संग एक सहायक के जाये के अनुमति होही। संग ही यात्री के स्वास्थ्य सुविधा बर डॉक्टर तको तैनात करे जाही। दरस करइया के रेहे अउ खाना के बेवस्था शासन डहर ले करे जाही।
श्री अग्रवाल ह किहिन हावय के अयोध्या म रामलला के परान प्रतिष्ठा समारोह 22 जनवरी के ऐतिहासिक पल के यादगार बनाये के खातिर छत्तीसगढ़ के सबो जिला अउ ब्लॉक स्तर म प्रमुख मंदिर म बिहनिया आरती, पूजा अउ भजन के आयोजन होही, उहें ए दिन संझा म नदी या तरिया के किनारे गंगा आरती के आयोजन करिन जाए अउ रोशनी करे जाही।
मकर संक्रांति म होही पतंग उत्सव
श्री अग्रवाल ह बताइन के मकर संक्रांति के मउका म राजधानी रायपुर के पुरखौती मुक्तांगन परिसर म बड़का पतंग परब के आयोजन करे जाए। येकर खातिर राज्य के संग-संग आन राज्य के तको पतंगबाज ल आमंत्रित करे जाए। पतंग महोत्सव के बड़का अउ आकर्षक रूप दे के खातिर देखइया अउ आम नागरिक के खातिर लोक कलाकार मन डहर ले गीत-संगीत के तको आयोजन करे जाही।
श्रीराम वनगमन पथ के वास्तविक स्वरूप के रखे जाही ध्यान
पर्यटन मंत्री बृजमोहन अग्रवाल ह किहिन के राज्य सरकार श्रीराम वनगमन पथ के उंकर वास्तविक स्वरूप के धियान म रखके बुता करही। ओमन गरियाबंद जिला के भूतेश्वर महादेव, जतमई-घटारानी, शिव महापीठ, सिरकट्टी आश्रम अउ कोपरा के कोपेश्वर महादेव के ट्रॉयबल परिपथ के रूप म विकसित करे के बात कही। येकर खातिर अधिकारी मनला जरूरी निर्देश दे गे हावयं।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।