रामलला परान प्रतिष्ठा के दिन छत्तीसगढ़ म रइही शुष्क दिवस

अंजोर.रायपुर, 3 जनवरी। अयोध्या म श्रीराम मंदिर म रामलला के परान प्रतिष्ठा के मउका म 22 जनवरी के छत्तीसगढ़ म शुष्क दिवस रइही। मुख्यमंत्री विष्णु देव साय ह ए जरूरी मउका म शुष्क दिवस करे जाये के काली घोसना करे रिहिस। येकर परिपालन म आबकारी विभाग ह आज निर्देश जारी करे हावयं। जानबा होवय के काली मुख्यमंत्री ह अपन वीडियो संदेश म किहिन के ये हमर सौभाग्य हावय के छत्तीसगढ़ भगवान राम के ननिहाल हावय। अयोध्या म रामलला के परान प्रतिष्ठा 22 जनवरी के होना हावय। येकर चलत देश भर म अउ छत्तीसगढ़ म उत्साह के माहौल हावय। जनआस्था ल देखत छत्तीसगढ़ म ए दिन शुष्क दिवस घोसित करही। ‘शुष्क दिवस‘ म दारू के कोनो भी दुकान, होटल, रेस्टॉरेन्ट, क्लब उक अउ दारू बेचे परोसे के मामला म जप्त करे के कार्यवाही के निर्देश दिये गे हावय।