मुख्यमंत्री साय ले बीसीसीआई के पूर्व अध्यक्ष सौरव गांगुली करिस मुलाकात

अंजोर.रायपुर, 3 जनवरी। मुख्यमंत्री विष्णु देव साय ले भारतीय क्रिकेट टीम के पूर्व कप्तान अउ बीसीसीआई के पूर्व अध्यक्ष सौरव गांगुली मुलाकात करिस। गांगुली ह मुख्यमंत्री ल नवा साल के सुभकामना दीस। मुख्यमंत्री ह तको गांगुली के बधाई दीस। ए बखत क्रिकेट बर छत्तीसगढ़ म अउ आने-आने विषय म औपचारिक गोठबात होइस।

चर्चा के बखत गांगुली ह मुख्यमंत्री ले क्रिकेट म रुचि के बारे म पूछिस। मुख्यमंत्री ह बताइन के क्रिकेट म अतका रुचि रिहिस के गांव म क्रिकेट खेले बर लकड़ी ले खुद बल्ला तइयार करत रिहिस। जशपुर जिला के बारे म बतावत ओमन बताइन के हमर इहां हाकी खेली जात हावय। इहां म पहाड़ी कोरवा जनजाति तीरंदाजी बहुत कौशल ले करत हावयं इही सेती तीरंदाजी म तको खिलाड़ी खूब रुचि लेवत हावयं।

गांगुली ह बताइन के वो पहिली बार छत्तीसगढ़ आये हाबे। इहां नवा रायपुर के स्टेडियम बहुत अच्छा हावय। मोला बताइन गे के इहां अंतरराष्ट्रीय मैच होइस हावय अउ सचिन जइसे मशहूर खिलाड़ी तको इहां खेल चुके हावयं। ओमन मुख्यमंत्री ले ये तको पूछिस के तुँहर कभू कोलकाता म आना होइस का। मुख्यमंत्री ह बताइन के केंद्रीय राज्य मंत्री के रूप म स्टील मंत्रालय देखे के बखत कोलकाता काफी जाना होवत  रिहिस। गांगुली ह छत्तीसगढ़ के बारे म विस्तार ले मुख्यमंत्री ले पूछिस। मुख्यमंत्री ह बताइन के छत्तीसगढ़ वनसंपदा ले समृद्ध हावय। प्राकृतिक रूप ले काफी खूबसूरत हावय। खनिज ले तको समृद्ध हावयं।

मुख्यमंत्री ह ए मउका म गांगुली के बेल मेटल ले बने राजकीय पशु वन भैंसा के मूरति अउ शॉल भेंट करके अभिनन्दन करिन। गांगुली ह मुख्यमंत्री ल सम्मानपूर्वक अपन दस्तखत करे होइस बल्ला भेंट करिन। ए मउका म वित्त मंत्री ओपी चौधरी, विधायक सम्पत अग्रवाल, मुख्यमंत्री के सचिव डॉ पी. दयानन्द तको उपस्थित रिहिस। विधायक अग्रवाल ह मुख्यमंत्री अउ गांगुली ल ए मउका म जगन्नाथ पुरी ले लाने गे भगवान जगन्नाथ के प्रसाद अउ छायाचित्र भेंट करिन।