राष्ट्रीय रक्षा कॉलेज के अध्ययन दल ल खूब भाइस बस्तर के सांस्कृतिक अउ प्राकृतिक सुंदरता

अंजोर.ए। छत्तीसगढ़ म राष्ट्रीय रक्षा कॉलेज के अध्ययन दल के अधिकारी बस्तर क्षेत्र के भ्रमण म पहुंचिस  हावयं।  अध्ययन दल ह बस्तर के सांस्कृतिक अउ प्राकृतिक सुंदरता के बढ़ई करिस। ए बखत अध्ययन दल ह दंतेवाड़ा के पर्यटन स्थल, बस्तर जिला के चित्रकोट, कुटुमसर के भ्रमण करिन। बुधवार के संझा के आसना स्थित बादल अकादमी म बस्तर के प्रमुख पारंपरिक लोक नृत्य अउ लोक गीत के प्रस्तुति देखके लोक कलाकार मन के हौसला-अफजाई करिस।

जानबा हो के राष्ट्रीय रक्षा कॉलेज के अध्ययन दल एक साल के पाठ्यक्रम म सामिल 6 सप्ताह के अंडर स्टैंडिंग इंडिया मॉड्यूल के तहत 120  अधिकारी मनका दल 8-8 आने-आने राज्य के दौरा करत हावय। इही क्रम म 16  अधिकारी मनका दल छत्तीसगढ़ पहुंचिस हावय, जेन प्रदेस म आंतरिक सुरक्षा के आने-आने पहलु सहित राज्य म हो रिहिन विकास बुता अउ गतिविधी के अध्ययन करके रिहिन हावयं। संग ही छत्तीसगढ़ के भौगोलिक स्थिति, सामाजिक-सांस्कृतिक बिसेसता मन सहित जनजाति बाहुल्य इलाका के बिसेस संदर्भ म जरूरी जानकारी के संग राज्य म शिक्षा, स्वास्थ्य, पर्यटन, उद्योग, महिला सशक्तिकरण के संग ही विकास ले जुड़े विषय म अध्ययन दल डहर ले अवलोकन करे जात हावय।

अध्ययन दल म सामिल पांच संगवारी देश-अमेरिका, कजाकिस्तान, सऊदी अरब, बांग्लादेश अउ नेपाल के  अधिकारी मनको छत्तीसगढ़ अउ बस्तर के सांस्कृतिक अउ प्राकृतिक सौंदर्य खूब भाइस हावय। ओमन बताइन के संगी अधिकारी छत्तीसगढ़ के ए सुन्दर यात्रा के लेके बहुत उत्सुक अउ खुश हावयं। अध्ययन दल म दल प्रभारी मेजर जनरल सामर्थ्य नागर के अगुवई म आईपीएस मानविन्दर सिंह भाटिया, एयर कमोडोर भुवन माथुर, ब्रिगेडियर वैभव मिश्रा, वैभव अग्रवाल, एस. सेन, विक्रांत पाटिल, टी. के. मिश्रा, व्ही. गणपति, बांग्लादेश ले आए कमोडोर मोहम्मद फैजल हक, सऊदी अरब ले कर्नल युसुफ बिन गाजी अल ओतैबी, नेपाल ले कर्नल बिमल कुमार बासनेत, कजाकिस्तान ले कर्नल जोल्डस नेसिपबायेव, अमेरिका ले कर्नल डाना डेमर, डीआरडीओ ले डॉ. कमल किशोर पंत, आईएनएएस ले कंवल सिंह सामिल हावय। बस्तर म कमिश्नर श्याम धावड़े, आईजी सुंदरराज पी. कलेक्टर विजय दयाराम के., पुलिस अधीक्षक शलभ सिन्हा, जिला पंचायत सीईओ प्रकाश सर्वे सहित आन  अधिकारी मनने बस्तर के सामाजिक-सांस्कृतिक विशिष्टता सहित आने-आने विकास गतिविधी ले अध्ययन दल के आरो करान।

गुरुवार के बिहनिया अध्ययन दल ह जगदलपुर शहर के तिर म बुरूंदवाडा सेमरा स्थित एमआरएफ (समृद्धि) के अवलोकन करिन। ओमन एमआरएफ सेंटर के गतिविधी के जायजा लेके कचरा अउ वेस्ट मेटेरियल के प्रबंधन के खातिर प्रशासन डहर ले करे  नवाचार के बढ़ई करे। सेंटर म वेस्ट मेटेरियल ले बने जैकेट के संबंध म पहुना मन के आरो कराइन।