भरे गरमी फिलिम के बरसात ले छॉलीवुड लबालब, जानव कब कोन फिलिम आही... !

सिनेमा। छत्तीसगढ़ी सिनेमा ले सिनेमाघर अब लबालब रइही सालभर। काबर के एन.माही फिल्म प्रोडक्शन एसो के भरे गरमी म फिलिम रिलीज के दनादन तारीख के घोसना करे हावय। जानबा होवय के एन.माही फिल्म प्रोडक्शन के ऑनर फिल्म मेकर मोहित साहू कोति ले सोशल मीडिया म एक साथ चार फिलिम के ऑफिसियल रिलीजिंग तारीख तय होय के आरो साझा करे गे हावय। ये बीच आन फिल्म  मेकर जेन फिलिम आही तेन अलग। अइसे म अंदाजा लगाये जा सकत हावय के अब छत्तीसगढ़ के सिनेमाघर ह छत्तीसगढ़ी फिलिम ले लबालब नइही। सालभर तरीख पे तारीख के खेल चलही। कभू-कभू हफ्ता म तो एक साथ एक ले आगर फिलिम ठकराये के तको संभावना हावय। माने दर्शक मन करा तको फिलिम के आप्शन रइही। इहों अब बॉलीवुड जइसे कलाकार मनके डेट के समस्या आही, वइसे अब तक देखे जाए तो सबो प्रोडक्शन हाउस जगा अपन-अपन टीम हावय अऊ उहीच मनला लेके फिलिम बनाथे। 

सिनेमाघर म अवइया मोहित साहू के फिलिम के बात करे जाए तो– 5 जुलाई 2004 - हंडा, 4 अक्टूबर 2024 - चंदा मामा, 27 दिसम्बर 2024 - जानकी अउ 3 मई 2025 - गुइयाँ 2 रिलीज करे के घोसना एक साथ करे गे हावय। हालांकि अभी कुछ फिलिम मनके काम चलते हावय, अऊ ऑफिसियल रिलीजिंग तारीख तय करे के बाद लउहे बुता करे जावथाबे। 

अइसने अभी कुछ हाल ही म माने 19 अप्रेल 2024 के प्रणव झा के फिलिम ‘बी.ए. फाइनल ईयर’ सिनेमाघर म अवइया हावय। 10 मई 2024 के ही फिलिम ‘माई के लाल रुद्रा’ तको सिनेमाघर म आही। ये बीच छॉलीवुड के बड़का फिल्म मेकर सतीश जैन के बहुप्रतिक्षित फिल्म ‘मोर छइंहा भुइंया 2’ तको 24 मई 2024 के सिनेमाघर म अवइया हावय। चंद्रशेखर चकोर के फिलिम ‘बेटा’ तको 5 जुलाई 2024 के ही सिनेमाघर म आही। 9 अगस्त 2024 के ‘लगन’ तको प्रदर्शन के तइयारी म हावय। इही कड़ी म निर्माता गजेंद्र श्रीवास्तव अउ निर्देशक मनोज वर्मा के फिलिम ‘सुकुवा’ 6 दिसंबर 2024 के सिनेमाघर म अवइया हावय।