छत्तीसगढ़ी फिल्म ‘जानकी’ म दिलेश साहू संग अनिकृति चौहान के सुघ्घर जोड़ी

अंजोर.सिनेमा। एन.माही फिल्म प्रोडक्शन के बैनर तरी बनत छत्तीसगढ़ी फिलिम ‘जानकी’ के शूटिंग बलौदाबाजार के एक गांव म शुरू होगे हवय। वइसे तो ये फिलिम के पोस्टर 2022 म ही सोशल मीडिया म आगे रिहिस। शुरू ले ही दिलेश साहू ल नायक के रूप म पोस्टर म उतारे गे रिहिस, अगोरा रिहिस ते नायिका के। पहिली नायिका म कोनो आन हिरोइन के नाव चलत रिहिस। फेर 2024 म होली के बाद ले ही नायिका के रूप म अनिकृति चौहान के नाम सामने अइस। संगे-संग शूटिंग के शेड्यूल के आरो तको सोशल मीडिया म प्रोडक्शन टीम कोति ले दिये गिस। 

बात देवन के दिलेश साहू अउ अनिकृति चौहान ‘जानकी’ के पहिली ‘तही बनबे मोर दुल्हनिया, मैं दिया तै मोर बाती, चल हट कोनो देख‍ लिही’ जइसे सफल फिलिम म एक संग काम कर डारे हवय। ‘तही बनबे मोर दुल्हनिया’ इही साल रिलीज होइसे जेकर निर्माता अउ निर्देशक रिहिस नीरा वर्मा। ‘मैं दिया तै मोर बाती’ के निर्माता रिहिस पवन तातेड़ जेमा कहानी अउ निर्देशन अभिषेक सिंह के रिहिस। ‘चल हट कोनो देख‍ लिही’ के निर्माता रिहिस छोटे लाल साहू अउ निर्देशन करे रिहिस सतीश जैन। माने ये दूनो के जोड़ी दर्शक मनके खास पसंद के हवय। 

छत्तीसगढ़ी सिनेमा म लव, रोमांस अउ एक्शन बर लो‍कप्रिय जोड़ी दिलेश साहू अउ अनिकृति चौहान ह युवा निर्देशक कौशल उपाध्याय के निर्देशन म जानकी के शूटिंग म रमे हावय। प्रोजेक्ट डिजाइन अउ छायांकन के बुता रजत सिंह राजपूत के हवय अउ संग सह निर्देशक के रूप अनुपमा मनहर हवय। 

एन.माही फिल्म प्रोडक्शन छॉलीवुड के एक बड़का प्रोडक्शन कंपनी आए जेन साल म कई ठी फिल्म बनाके दर्शक मनके सुघ्घर मनोरंजन करथे। एसो उंकर ‘गुईंया’ फिलिम बनेच चलिस जेमा अमलेश नागेश अउ हेमा शुक्ला अभिनय करे रिहिस, निर्देशक रिहिस मनीष मानिकपुरी। अमलेश गुईंया के बाद एन.माही फिल्म प्रोडक्शन बर अभिनय के संग लेखन अउ निर्देशक के रूप म ‘हंडा’ के शूटिंग पूरा करे हावय। संग म ‘चंदा मामा’ भी लाइन म हावय। 

अब फिल्म मेकर मोहित कुमार साहू अपन नवा कहानी ‘जानकी’ म काम करत हावय। बहरहाल अभी तो शूटिंग शूरू होए हावय जेमा दिलेश साहू अउ अनिकृति चौहान के संग जीत शर्मा, नीरज उइके, नितिन ग्वाला, दीपा उपाध्याय, सुमित्रा साहू, बिंदास बहुरानी, अनुनाय शर्मा के नाम के सोर उड़त हावय। अऊ जादा जानकारी बन बने रहाय सोशल मीडिया म, कलाकार मनके अपडेट लेवत राहव छत्तीसगढ़ी सिनेमा के चिभिक लगाये। 

• फिल्म - जानकी
• निर्माता / कहानी - मोहित कुमार साहू
• निर्देशक - कौशल उपाध्याय 
• प्रोजेक्ट डिजाइन/छायांकन - रजत सिंह राजपूत
• स्टार कास्ट - दिनेश साहू, अनिकृति चौहान 
• सह निर्देशक - अनुपमा मनहर

फिल्‍म निर्माता मोहित कुमार साहू

फिल्‍म निर्देशक कौशल उपाध्‍याय

कौशल उपाध्‍याय, दिलेश साहू, अनिकृति चौहान, रजत सिंह

सहायक फिल्‍म निर्देशिका अनुपमा मनहर

अभिनेत्री अनिकृति चौहान

अभिनेता दिलेश साहू

अभिनेत्री बिंदास बहुरानी 'वंदना साहू'

अभिनेता जीत शर्मा