बृजमोहन अग्रवाल दीस विधायक पद ले इस्तीफा

अंजोर,रायपुर.ए। लोकसभा चुनई म छत्तीसगढ़ ही नही बल्कि देश म तको सबले जादा मत ले जीते के पांत मं अपन नाव दर्ज करइया सांसद बृजमोहन अग्रवाल ह विधानसभा अध्यक्ष डॉ. रमनसिंह ल अपन विधानसभा के सदस्यता ले इस्तीफा पाती सउत दिस। 

जनबा होवय के बृजमोहन अग्रवाल जी ह सरलग 35 साल मध्यप्रदेश अउ छत्तीसगढ़ म रायपुर ले विधायक राहत जनता के खूबेच सेवा करे हाबे। ओमन अब पहिली बार रायपुर लोकसभा ले सांसद बने के बाद बड़ भावुकता ले सोशल मीडिया म अपन बात रखत किहिन के- 'जब जिम्मेदारी बाढ़थे तव बहुत कुछ छोड़े बर तको परथे। 35 बच्छर ले आगर बेरा मध्य प्रदेश अउ छत्तीसगढ़ विधानसभा के कार्यवाही म शामिल रेहे अउ राज्य के विकास अउ खुशहाली खातिर बुता करे के बाद आज विधायक पद ले इस्तीफा देना मोर बर बहुत ही भावुक क्षण हे। नवा ऊर्जा के साथ रायपुर लोकसभा अउ छत्तीसगढ़ के लिए काम करूहूं। अपन जनता खातिर जइसे उंकर मोहन रिहिस, आगू तको उंकर मोहन रइही।'

ये मउका म बृजमोहन अग्रवाल अउ विधानसभा अध्यक्ष डॉ. रमनसिं​ह के अलावा, विधायक अजय चंद्राकर, राजेश मूणत, अनुज शर्मा, पुरंदर मिश्र, सुखवंत साहबे, देवजी भाई पटेल, अशोक बजाज, पूर्व सांसद सुनील सोनी सहित कई बड़का भाजपा नेता जुरियाए रिहिन।