छत्तीसगढ़ के मुख्यमंत्री विष्णुदेव साय ह प्रधानमंत्री नरेंद्र मोदी ले करिस मुलाकात, छत्तीसगढ़ विजन डॉक्यूमेंट अउ माओवादी विरोधी अभियान के दीस जानकारी

 मुख्यमंत्री विष्णुदेव साय अउ प्रधानमंत्री नरेंद्र मोदी

अंजोर.रायपुर,ए। मुख्यमंत्री विष्णुदेव साय ह प्रधानमंत्री नरेंद्र मोदी ले संसद भवन म मुलाकात करिस। ए मउका म ओमन नरेंद्र मोदी ल तिसरइया पइत प्रधानमंत्री बने म बधाई दीस।

मुलाकात के बखत मुख्यमंत्री साय ह प्रधानमंत्री के अमृतकाल: छत्तीसगढ़ विजन 2047 ‘विजन डॉक्यूमेंट’ के बारे म जानकारी देवत बताइन के येला राज्य नीति आयोग डहर ले बनाये जात हावय जेला एक नवंबर के राज्य के जनता ल समर्पित करे जाही।

मुख्यमंत्री ह पाछु छह महीना म माओवादी विरोधी अभियान म करेे गे कार्रवाई के जानकारी तको प्रधानमंत्री ल दीस। ओमन बताइन के माओवादी समस्या के समूल उन्मूलन बर ज्वाइंट एक्शन प्लान तइयार करके कार्रवाई करे जात हावय।

नियद नेल्लानार योजना (आपका अच्छा गाँव) के बारे म जानकारी देत मुख्यमंत्री ह बताइन के ए योजना के तहत नक्सली मन के आधार ल कमजोर करे अउ शासन-प्रशासन अउ गांव वाला के बीच परस्पर विश्वास बहाली के बुता करे जात हावय। ए योजना के तहत अभी के बेरा म 23 कैंप खोले गे हावयं, जेमे 90 गांव सामिल हावयं अउ भविष्य म 29 कैंप सुरू करे के योजना हावय।

श्री साय ह मोदी के गारंटी पूरा करे के दिशा म उठाए गे कदम के जानकारी देवत बताइन के नवा सरकार के गठन के बाद मंत्रिपरिषद के पहिली बइठक म ही प्रधानमंत्री आवास योजना (ग्रामीण) के तहत 18 लाख 12 हजार 743 परिवार के घर दे के फइसला ले गिस। अभी के बेरा म 1 लाख 6 हजार 777 घर निर्माणाधीन हावय, जेकर मंजूरी पहिली म ही करे जा चुके हावय।

मुख्यमंत्री ह बताइन के धान उत्पादन प्रोत्साहन योजना ले किसान मन ल साल 2014-15 अउ साल 2015-16 के खातिर 3 हजार 667 करोड़ के रकम दे गे हावय। उहें किसान उन्नति योजना के तहत साल 2023 के खातिर कुल 24 लाख 73 हजार किसान मन के 13 हजार 287 करोड़ के रकम के भुगतान करे गे हावय।

मुख्यमंत्री ह बताइन के राज्य म महिला मन के आर्थिक स्वावलंबन अउ सशक्तिकरण के बढ़ावा दे के खातिर महतारी वंदन योजना सुरू करे गे हावय। ए योजना के तहत अब तक लगभग 70 लाख महिला मन के चार महीना के वित्तीय मदद 2618 करोड़ रूपिया के रकम दे जा चुके हावय।

प्रधानमंत्री ल श्रीरामलला दरसन योजना के बारे म बतावत श्री साय ह किहिन के येकर खातिर आईआरसीटीसी के संग एमओयू करे गे हावय। ए योजना के तहत हर साल 20 हजार यात्री ल यात्रा कराये के लक्ष्य हावय।

छत्‍तीसगढ़ी़ अनुवाद- जयंत साहू

संपादक 'अंजोर' वेब पोर्टल