साय सरकार के परिवर्तनकारी कदम ले संवरत छत्तीसगढ़, दूरस्थ अंचल म तको बगरत विकास के अंजोर

अंजोर.रायपुर,ए। छत्तीसगढ़ म मुख्यमंत्री विष्णु देव साय के अगुवई म गठित नवा सरकार आम जनता के जिनगी ल आसान बनाये अउ ओला एक बढि़या सामाजिक जिनगी दे के खातिर सरलग काम करत हावय। शिक्षा, स्वास्थ्य, रोजगार, सड़क, बिजली, पानी जइसे मूलभूत सुविधा के दूरस्थ अंचल तक पहुंचााये के खातिर तको बिसेस कदम उठावत हावय, इही सेती नियद नेल्लानार जइसे योजना मन आज बड़ा बदलाव लावत हावय।

आम नागरिक के सुविधा ल धियान रखत मुख्यमंत्री विष्णु देव साय के अगुवई म प्रशासनिक कसावट लान के तेजी ले काम करे जात हावय। छत्तीसगढ़ म किसान मनके बड़े आबादी हावय, कृषि आधारित अर्थव्यवस्था वाला ए राज्य म खेती-किसानी के खातिर किसान मन ल अनुकूल माहौल अउ आर्थिक मजबूती मिलय येकर तको सरकार धियान रख हावय। किसान उन्नति योजना म किसान मन के समृद्धि के उद्देश्य लेके साय सरकार 3100 रूपिया प्रति कोंटल के हिसाब ले धान के खरीदी करत हावय। किसान मन के दू साल के 3716 करोड़ रूपिया के बाकी बोनस भुगतान तको कर दे हावय।

गरीब ल घर देना साय सरकार के प्राथमिकता म सामिल हावय, जेला पूरा करत सरकार ह प्रधानमंत्री आवास योजना ले 18 लाख ले जादा परिवार ल घर दे के फइसला लिस हावय। साल 2023-24 के अनुपूरक बजट म 3799 करोड़ रूपिया अउ साल 2024-25 के बजट म 8369 करोड़ रूपिया के प्रावधान करे गे हावय। हितग्राही मन के योजनांतर्गत घर बनाये के खातिर फोकट म रेत के सुविधा दे जात हावय। गरीब मन के हित म कदम उठात एक करोड़ ले जादा परिवार ल 5 साल तक निशुल्क राशन के तको बेवस्था करे हावय।

परिवार के जिम्मेदारी ल पूरा करे के खातिर अपन सपना ल ख़ुशी-ख़ुशी न्यौछावर करइया गृहणी मनके साय सरकार ह बिसेस धियान रखे हावय। महतारी वंदन योजना आज पूरा देश म एक मिसाल के तौर म उभरे हावय, जेमा 70 लाख ले जादा महिला हितग्राही मन ल हर महीना 1000 रूपिया के मान ले साल म 12000 रूपिया के आर्थिक मदद रकम दे जात हावय। युवा मन के संग न्याय हो अउ सरकारी नौकरी मन म भरती प्रक्रिया म पारदर्शिता आ सके ए दिशा म तको साय सरकार बिसेस प्रयास करत हावय। युवा मन ल सरकारी भरती म बढि़या मउका दे खातिर उमर सीमा म 5 साल के छूट दे के फइसला ले हावय।

माओवाद प्रभावित इलाका म छत्तीसगढ़ सरकार तुरते अउ सख्त फइसला ले पाछु 6 महीना म 136 माओवादी ढेर, 526 गिरफ्तार अउ 442 के आत्मसमर्पण जइसे उपलब्धि माओवाद समस्या के पूरा निदान तनि बड़े सफलता हावय।

छत्‍तीसगढ़ी अनुवाद- जयंत साहू

संपादक 'अंजोर'वेब पोर्टल