अमृता कुशवाहा अउ मोना वर्मा के ऑफिशियल यूट्यूब चैनल 'छत्तीसगढ़िया नोनी' ल मिलिस सिल्वर प्ले बटन

अंजोर.सिनेमा। छत्तीसगढ़ म तको सोशल मीडिया के गजब खुमारी हावय। टिकटाक के दौर म मिलियनस यूजर मन लोकप्रियता के चरम म पहुंचे के बाद, भारत म बैन होए के बाद थोरिक दिन बर मायूस जरूर होए रिहिन। लेकिन बाद म दूसर विकल्प के संग फेर सोशल मीडिया म दमदार एंट्री मारिस जेन गजब बड़ई के बात हावय। इही दौर के दू झिन नोनी अमृता कुशवाहा अउ मोना वर्मा मन ऑफिशियल यूट्यूब चैनल 'छत्तीसगढ़िया नोनी' के नाम ले चैनल बनाके सरलग अपन प्रतिभा ल देखावत रिहिस। अमृता कुशवाहा अउ मोना वर्मा मन ब्लॉग के संग वीडियो एल्बम म तको रमे रिहिन। उंकर मनके कई ठी गीत मन वायरल तको हाए हाबे।

अब ये जानकारी मिले हाबे के ओमन के चैनल Chhattisgarhiya Noni जेन 4 जुलाई 2020 के शुरू होए रिहिसे। अब तक ओमा एक हजार वीडियो अपलोड करे जा चुके हावय अउ सब्सक्राइबर के बात करे तो 1.19 लाख सदस्य जुरे हावय। अउ यूट्यूब ह 1 लाख सब्सक्राइबर पूरा करे म सिल्वर प्ले बटन ले सम्मनित करथे।

अमृता कुशवाहा अउ मोना वर्मा के तको सिल्वर प्ले बटन आ चुके हावय। ये बहुत बड़का खुशी के बात आए के ओमन 4 जुलाई 2020 ले चैनल ल शुरू करे रिहिस, अउ एदे ओमन के चैनल के 4 चार के पुरा होतेच ही सिल्वर प्ले बटन के सम्मान आगे। दूनो नोनी मन ला हमर कोति ले बहुत बहुत बधाई अउ शुभकामना।

अमृता कुशवाहा बर एसो के साल 2024 बड़ भागमानी साबित होइस-

एन माही फिल्म प्रोडक्शन के बैनर तरी बने छत्तीसगढ़ी फिल्म 'हंडा' म अमृता कुशवाहा के अहम किरदार हावय। सुपरस्टार अमलेश नागेश के लेखन अउ निर्देशन म हास्य के हंगामा धरे 'हंडा' अवइया 5 जुलाई 2024 के छत्तीसगढ़ म रिलीज होवइया हाबे। इही ओढ़र म एक अउ जबर खुशी हे आरो मिले हावय के निर्माता मोहित साहू ह अमृता कुशवाहा अउ जित्तू साहू दुलरवा ल लेके 'सुरतिया' बनाये के घोसना करे हावय। निश्चित ही अमृता बर एसो साल ह जिनगी म नवा उच्छाह अउ उंमग के संग अपन सपना ल पूरा करे के साक्षी बनही।