अंजोर.रायपुर,ए। मुख्यमंत्री विष्णु देव साय के बिसेस पहल म आम नागरिक ल एक अउ नवा सुविधा परिवहन विभाग के माध्यम ले मिले बर जात हावय। ड्राइविंग लाइसेंस अउ पंजीयन परमान पाती आवेदन करइया डहर ले दे गे पते म नइ पहुंचे म आवेदन करइया ल उंकर जिला के क्षेत्रीय, अकताहा क्षेत्रीय अउ जिला परिवहन कार्यालय के माध्यम ले बांटे जाही। परिवहन विभाग डहर ले ये सुविधा एक जुलाई ले लागू करे जात हावय।
मुख्यमंत्री साय के तीर ये बात आगू आये के परिवहन विभाग डहर ले डाक के माध्यम ले भेजे गे कई ड्राइविंग लाइसेंस अउ पंजीयन परमान पाती पता सही नइ होए के सेती नया रायपुर के परिवहन विभाग के मुख्यालय इन्द्रावती भवन म वापस लहुंट आथे। अइसे आवेदन करइया ल अपन ड्राइविंग लाइसेंस अउ पंजीयन परमान पाती खातिर नवा रायपुर आना परत रिहिस। मुख्यमंत्री ह आवेदन करइया के दिक्कत ल महसूस करत परिवहन विभाग के अधिकारी मनला ये निर्देश दे गिस के कोनो सेती ले बाकी रहे ड्राइविंग लाईसेंस अउ पंजीयन परमान पाती संबंधित जिला के क्षेत्रीय, अकताहा क्षेत्रीय, जिला परिवहन कार्यालय के माध्यम ले बांटे जाए।
परिवहन विभाग के अधिकारी मन बताइन के अस्पष्ट या अधूरा पता के सेती नवा रायपुर के परिवहन मुख्यालय लहुटे ड्राइविंग लाइसेंस अउ पंजीयन परमान पाती ले के खातिर नवा रायपुर आने के जरूरत नइ होही। आवेदन करइया संबंधित कार्यालय ले वैध दस्तावेज प्रस्तुत करके अपन चालक लाईसेंस या पंजीयन परमान पाती पा सकहीं। ए संबंध म परिवहन विभाग डहर ले सबो अधीनस्थ कार्यालय ल दिशा-निर्देश जारी कर दे गे हावयं।
छत्तीसगढ़ी अनुवाद- जयंत साहू
सपांदक 'अंजोर' वेब पोर्टल
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।