विष्णुदेव साय के अगुवई म यूनिफाईड कमाण्ड के होइस बइठका

अंजोर.रायपुर,ए। मुख्यमंत्री विष्णु देव साय ह सर्किट हाउस रायपुर म आयोजित यूनिफाईड कमाण्ड के बइठक म किहिन के छत्तीसगढ़ राज्य म माओवादी गतिविधी म सरलग कमी आत हावय। राज्य म केन्द्रीय सुरक्षा बल अउ छत्तीसगढ़ पुलिस डहर ले बढि़या तालमेल के संग माओवादी मन के विरूद्ध सफलतापूर्वक चलाये जात समिलहा अभियान के सेती ये संभव हो सके हावय। माओवादी मनके विरूद्ध चलाये जात सघन अभियान के संगे-संग शासन के नवा ‘नियद नेल्लानार योजना’ के तहत विकास बुता म तको तेजी लाए जात हावय, जेकर ले आम जनता के शासन अउ प्रशासन के प्रति विश्वास बढ़त हावय।

मुख्यमंत्री साय ह माओवाद प्रभावित क्षेत्र म विकास बुता के प्राथमिकता देत होइस सुचारू आवागमन बर सड़क, पुल-पुलिया अउ आन सरकारी निर्माण बुता के उच्च गुणवत्ता के संग करार समय सीमा म पूरा करे ल निर्देश दिस। माओवाद प्रभावित क्षेत्र म संचालित निर्माण बुता ल लघियात पूरा करे जाये बर जरूरी सुरक्षा बेवस्था उपलब्ध कराये के तको निर्देश मुख्यमंत्री साय डहर ले दिये गये।

बइठक म माओवाद प्रभावित क्षेत्र म पुलिस के सूचना तंत्र के अउ जादा मजबूत बनाये जाये अउ स्थानीय गांव वाला के विश्वास म लेके माओवाद के विरूद्ध अभियान चलाने के निर्देश दिये गिस। संग ही माओवाद प्रभावित क्षेत्र म तैनात केन्द्रीय अउ राज्य के सुरक्षा बल के जवान मन के समस्या के लेके तको गोठबात करे गिस अउ सुरक्षा बल के कैम्प मन म जवान मन के जरूरी मूलभूत सुविधाअउ संसाधन उपलब्ध कराइन के निर्देश दिये गिस। बइठक म छत्तीसगढ़ राज्य के सीमावर्ती राज्य विशेषतः महाराष्ट्र, तेलंगाना, आन्ध्रप्रदेश अउ उड़ीसा के संग बढि़या समन्वय, सीमावर्ती क्षेत्र म समिलहा कार्यवाही, सम्पर्क रसता म सुरक्षा बल डहर ले सतत निगरानी के निर्देश दिये गिस अउ सीमावर्ती राज्य के संग सूचना ल साझा करे जाये म तको जोर दे गिस। संग ही ये तको निर्देश दिये गे के माओवादी मन के विरूद्ध चलाये जात अभियान म ये सुनिश्चित करे जाए के स्थानीय गांव वाला के कोनो रकम ले के असुविधा नइ हो।

बइठक म उप मुख्यमंत्री अउ गृह मंत्री विजय शर्मा, मुख्य सचिव अमिताभ जैन, पुलिस महानिदेशक अशोक जुनेजा, अपर मुख्य सचिव (गृह) मनोज पिंगुआ, केन्द्रीय गृह मंत्रालय अउ राज्य शासन, केन्द्रीय सुरक्षा बल अउ राज्य पुलिस के वरिष्ठ अधिकारी अउ आने-आने विकास एजेंसियों के वरिष्ठ अधिकारीगण उपस्थित रिहिस।

Chhattisgarhi translation by Jayant Sahu

Editor 'Anjor' Web Portal